Aju uʼj Aju Xqʼuqil mas in xi sipet twitz tkyaqil Txʼotxʼ, tiʼj tajlal teyele junjun uʼj in netz 42 millón. Aju tkabʼ uʼj aju ¡Weʼktza!, in netz 41 millón. Kykabʼil uʼj lu bʼinchaʼn qe kyuʼn testigos de Jehová ex in chex sipet toj 236 tnam ex tembʼil.

¿Yajtzun junjuntl uʼj? In tzaj tqʼamaʼn The Association of Magazine Media qa aju uʼj te Estados Unidos mas in xi kʼayit aju in netz tuʼn American Association of Retired Persons, aju jun kʼloj xjal in che onin kyiʼj xjal ma che ikʼ tibʼaj 50 abʼqʼi. Aju uʼj lu in netz 22,4 millón. Ex toj tnam Alemania, in xi sipet 14 millón uʼj aju ADAC Mortorwelt tbʼi, ax ikx toj tnam China in netz 5,4 millón uʼj aju Gushi Hui (junjun txʼolbʼabʼil).

Kyxol qeju uʼj periódico mas in chex sipet, at aju diario te tnam Japón aju Yomiuri Shimbun tbʼi, tuʼnju in netz mas te 10 millón.

Aʼyeju uʼj in che etz kyuʼn testigos de Jehová ax ikx mas in che kubʼ qʼoʼn kyoj txqantl yol, ik tzeʼn uʼj Aju Xqʼuqil in netz toj 190 yol ex aju uʼj ¡Weʼktza! in netz toj 80 yol. Atzun te uʼj Reader’s Digest (aju Selecciones tbʼi toj kastiy) in netz toj 21 yol, ex junxitl aju in tzaj tqʼamaʼn toj junjuntl tnam.

Aju juntl tbʼanel kyiʼj uʼj Aju Xqʼuqil ex ¡Weʼktza! aju in che etz noq tuʼn junjun onbʼil in xi qʼet. Nya chjoʼn kywiʼ aj kyxi qʼet kye xjal ex mintiʼ in netz kyqʼoʼn junjun tqanil tiʼj kykʼaʼẍ xjal.

In netz uʼj Aju Xqʼuqil tuʼn tel qnikʼ tiʼj Tyol Dios ex mas in yolin tiʼjju in tzaj tqʼamaʼn Xjan Uʼj tiʼj Tkawbʼil Dios. Aju uʼj lu kukx in netz atxix toj 1879. Ex aju uʼj ¡Weʼktza! in yolin kyiʼj junjun xnaqʼtzbʼil in che ximen xjal tiʼj —ik tzeʼn tiʼjju o tzʼel kynikʼ xjal tiʼj ex ik tzeʼn tiʼj junjun tchʼisbʼen Dios— tuʼntzun tonin kyiʼj xjal tuʼn tchʼiy qʼuqbʼil kykʼuʼj tiʼj Dios. Ax ikx in tzaj tqʼamaʼn alkye tten jaku tzʼonin Tyol Dios toj qanqʼibʼil.