Revista Akin Tetlapouijtok sapanoa miak kichijchiuaj uan moxejxeloa itech nochi Tlaltikpak, amo ken okseki revistas. Kinchijchiuaj kanaj 42 millones sejse metstli. Uan revista ¡Despertad!, kichijchiuaj 41 millones. Ninmej ome revistas tlen kinchijchiuaj iTlaixpantijkauan Jehová, moxexeloaj itech 236 uejueyij altepemej.

¿Onka okse revista tlen sapanoa miak ma kichijchiuakan? Ijkon ken kijtoa The Association of Magazine Media, se nechikol tlen itoka American Association of Retired Persons itech altepetl Estados Unidos kichijchiuaj se revista tlen okachi monemaka, kanaj 22.4 millones, nin kinpaleuia tlaltikpaktlakamej tlen yikipiaj 50 xiuitl noso okachi. Okse revista tlen kichijchiuaj Alemania, ADAC Motorwelt, kichijchiuaj kanaj 14 millones. Uan se revista tlen kichijchiuaj itech altepetl China tlen itoka Gushi Hu (tlapoualismej) kichijchiuaj kanaj 5.4 millones.

Uan noijki katej periódicos tlen sapanoa miak kinchijchiuaj, ken periódico japonés Yomiuri Shimbun, kichijchiuaj kanaj 10 millones.

Noijki revistas tlen kinchijchiuaj iTlaixpantijkauan Jehová kintlajtolkuepaj ika miakej tlatlamantli tlajtolmej. Ken revista Akin Tetlapouijtok motlajtolkuepa ika 190 tlatlamantli tlajtolmej uan ¡Despertad! ika 80. Pero revista, Reader’s Digest (ika español, Selecciones) mochijchiua ika 21 tlatlamantli tlajtolmej uan itech okseki altepemej kipatlaj tlen kijtoa.

Onka okse tlamantli tlen ika moixmatij ninmej revistas Akin Tetlapouijtok uan ¡Despertad!, mochijchiuaj ika tomin tlen kitemakaj ika nochi inyolo tlaltikpaktlakamej. Amo kiteititiaj tlamantli tlen monemakaj uan amo monemakaj ninmej revistas.

Revista Akin Tetlapouijtok opejkej kichijchiuaj itech xiuitl 1879 pampa okachi techmachtis tlen kijtoa Biblia uan techtlapouis itech iTekiuajkayo toTajtsin Dios. Uan revista ¡Despertad! techtlapouia itech miak tlamantli —ken itech ciencia uan itech Tlaltikpak— tlen kichiua ma titlaneltokakan itech toTajtsin Dios. Noijki techititia ken techpaleuia iTlajtol toTajtsin Dios itech tonemilis.