Wastaua—No Gat Wanpela Magasin i Wankain Olsem
Ol i save wokim na tilim Wastaua long olgeta hap bilong graun winim ol narapela magasin. Ol i save prinim moa long 41 milion kopi bilong wanpela Wastaua. Nius Kirap! em namba 2, na ol i save prinim 41 milion kopi bilong wanpela nius Kirap!. Ol Witnes Bilong Jehova i wokim dispela 2-pela magasin na ol i tilim long 236 kantri.
Olsem wanem long ol arapela magasin? Wanpela lain ol kolim The Association of Magazine Media i tok namba wan magasin bilong Amerika we ol manmeri i save baim em magasin bilong AARP (American Association of Retired Persons), em wanpela oganaisesen we i save wokim magasin bilong ol lain i winim pinis 50 krismas. Ol i save prinim na salim 22.4 milion kopi bilong dispela magasin. Wanpela klap long Jemani ol i kolim ADAC Motorwelt i save prinim na tilim 14 milion kopi bilong magasin, na Gushi Hui (ol stori) bilong Saina i save prinim na tilim 5.4 milion kopi bilong magasin.
Na long sait bilong niuspepa, nius Yomiuri Shimbun bilong Japan i winim ol narapela niuspepa long graun. Ol i save prinim na tilim moa long 10 milion kopi long olgeta taim.
Ol Witnes i trensletim ol pablikesen bilong ol i go long planti tokples moa. Ol i trensletim nius Wastaua long winim 190 tokples, na trensletim nius Kirap! long winim 80 tokples. Wanpela magasin ol i kolim Reader’s Digest, ol i trensletim i go long 21 tokples, tasol ol tok bilong en i narapela narapela long ol narapela narapela kantri.
Tasol nius Wastaua na Kirap! i no wankain olsem ol dispela narapela magasin bikos ol i yusim mani i kam long rot bilong donesen long prinim dispela tupela magasin, ol i no save mekim edvetaismen bilong ol, na i no gat pe bilong ol.
Wok bilong nius Wastaua em bilong eksplenim ol bikpela tok bilong Baibel—na moa yet em tok Baibel i mekim long Kingdom Bilong God. Ol i kirapim wokim dispela nius long yia 1879 i kam inap long nau. Nius Kirap! i save stori long ol narapela samting, kain olsem ol samting i stap long graun o spes na saiens, na kirapim man long bilip long Krieta. Nius Kirap! i stori tu long hau ol tok bilong Baibel inap helpim yumi.