Magazini wa Xihondzo xo Rindza hi wona lowu kandziyisiwaka swinene ku tlula timagazini hinkwato emisaveni. Ku kandziyisiwa tikopi to tlula 42 wa timiliyoni ta nkandziyiso ha un’we wa n’hweti. Magazini wa Xalamuka! hi wona wa vumbirhi emisaveni hikuva ku gandziyisiwa tikopi ta 41 wa timiliyoni ta nkandziyiso ha un’we wa n’hweti. Timagazini leti hatimbirhi ti gandziyisiwa hi Timbhoni ta Yehovha naswona ti hangalasiwa ematikweni ya 236.

Ti famba njhani timagazini letin’wana loko ti pimanisiwa ni leti? Hi ku ya hi Association of Magazine Media, magazini lowu xavisiwaka lowu fambaka emahlweni eUnited States wu kandziyisiwa hi AARP, ku nga khampani leyi tsalelaka vanhu lava nga ni malembe lama tlulaka 50. Magazini wolowo wu kandziyisiwa hi tikopi to tlula 22,4 wa timiliyoni. Magazini wa ADAC Motorwelt wa le Jarimani wu kandziyisiwa hi tikopi ta kwalomu ka 14 wa tmiliyoni kasi magazini wa Gushi Hui (wa switori) wa le Chayina wu kandziyisiwa hi tikopi ta 5,4 wa timiliyoni.

Loko swi ta eka maphepha-hungu, phepha-hungu ra Yomiuri Shimbun ra le Japani hi rona leri kandziyisiwaka ngopfu ku tlula hinkwawo. Ku kandziyisiwa tikopi leti tlulaka 10 wa timiliyoni.

Timagazini ta Timbhoni ti tlhela ti famba emahlweni hi nhlayo ya tindzimi leti ti hundzuluxeriwaka ha tona. Xihondzo xo Rindza xi hundzuluxeriwa hi tindzimi to tlula 190 kasi Xalamuka! hi tindzimi to tlula 80. Loko ku pimanisiwa, magazini wa Reader’s Digest wu kandziyisiwa hi tindzimi ta 21 hambileswi rungula ra kona ri hambanaka hi ku ya hi matiko.

Ku hambana ni timagazini tin’wana leti boxiweke laha, Xihondzo xo Rindza ni Xalamuka! swi seketeriwa hi minyikelo ya ku tirhandzela, a yi navetisiwi naswona a yi xavisiwi.

Xikongomelo xa Xihondzo xo Rindza i ku hlamusela tidyondzo ta Bibele​—ngopfu-ngopfu leswi Matsalwa ma swi vulaka hi Mfumo wa Xikwembu. Yi sungule ku kandziyisiwa nkarhi ni nkarhi ku sukela hi 1879. Xalamuka! yi vulavula hi timhaka leti tolovelekeke to tanihi ntumbuluko ni sayense hi xikongomelo xo pfuna vanhu leswaku va va ni ripfumelo eka Muvumbi. Yi tlhela yi kandziyisa ndlela leyi Bibele yi nga hi pfunaka ha yona evuton’wini bya hina.