Te La Atalaya ya yichʼ pasel imprimir 42 miyon ta jujun buelta, jaʼ te revista te kʼax bayal yichʼoj pukel ta swolol Balumilal. Te schebale jaʼ te ¡Despertad! te ya yichʼ pasel imprimir 41 miyon ta jujun buelta. Te revistaetik ini jaʼ spasojik te stestigotak Jehová sok ya yichʼ pukel ta 236 nasionetik sok ta lumetik.

¿Bin-utʼil maba pajal sok te yantik revistaetike? Te revista The Association of Magazine Media te bayal ya yichʼ chonel ta Estados Unidos, jaʼ spasojik te American Association of Retired Persons, te jaʼ jun organisasion ta swenta meʼel mamaletik te kʼaxemix ta 50 yaʼbilalike. Te revista-abi ya yichʼ pasel imprimir 22,4 miyon ta jujun buelta. Te revista ADAC Mortorwelt te pasbil ta Alemania ya yichʼ pasel imprimir 14 miyon ta jujun buelta. Te revista Gushi Hui (te ya yalbey skʼoplal biluk aʼiyejetik) ya yichʼ pasel imprimir 5,4 miyon te ya yichʼ pasel ta china.

Te periodikoetik te kʼax bayal ya yichʼ pukele, jaʼ te Yomiuri Shimbun te pasbil ta Japón ya yichʼ pasel imprimir kʼaxem ta 10 miyon.

Te revistaetik yuʼun te stestigotak Jehová jaʼnix jich bayal yichʼoj kʼasesel ta yantik kʼopil, jich bitʼil te La Atalaya yichʼoj kʼasesel ta 190 ta chajp kʼopil, te ¡Despertad! ta 80 ta chajp kʼopil. Yan stukel te Reader’s Digest (ta español, Selecciones) ya yichʼ kʼasesel ta 21 ta chajp kʼopil sok ya xjelon te bin ya yalbey skʼoplal ta jujun nasion.

Te binxan yuʼun te maʼyuk yan revista te ya xpajot te La Atalaya sok te ¡Despertad! jaʼ te bitʼil jaʼ ya yichʼ pasel-a te takʼin yuʼun te machʼatik jich yipal ya xlokʼ ta yoʼtanik yakʼele. Maʼyuk ya spukbey skʼoplal ta swenta manbajel o chonbajel sok maba ya yichʼ chonel.

Te bin swentail te ya yichʼ pasel te La Atalaya te maba komen ta pasel jaʼto te jajch tal ta yaʼbilal 1879, jaʼ ya yakʼ ta naʼel te bin ya yal te Bibliae sok te bin mukʼxan skʼoplal ya yakʼ ta naʼele, jaʼ te Ajwalinel yuʼun te Diose. Te ¡Despertad! jaʼ ya yalbey skʼoplal temaetik te ya smulanik snopel te ants winiketike, jich bitʼil te bintik ya snopbeyik skʼoplal te jpʼijil winiketike sok spisil te bintik aye, swenta ya stijbey yoʼtan te ants winiketik yuʼun yakuk yakʼik schʼuunel yoʼtanik ta stojol te Diose. Jaʼnix jich ya yakʼ ta ilel te bayal ya xjuʼ xtuun kuʼuntik te bin ya yal te Bibliae.