Muʼyuk kʼusi xkoʼolaj-o Li Jkʼel osil ta toyole, yuʼun stuk noʼox ti toj ep chichʼ pukel ta spʼejel Balumile, chichʼ pasel imprimir mas ta 42 miyon jujukoj. Li yan revista ti toj ep chichʼ pukel xtoke jaʼ li ¡Despertad! ti 41 miyon chichʼ pasel imprimir jujukoje. Jaʼ tspasik stestigotak Jeova xchaʼlikal xchiʼuk chichʼ pukel ta 236 lumetik.

¿Kʼusi xuʼ xkaltik ta sventa li yan revistaetike? Xi chal jun organisasion ti jaʼ sbi The Association of Magazine Media: «Li revista ti mas chichʼ chonel ta Estados Unidose jaʼ li revista ti tspasik li American Association of Retired Persons, ti jaʼ jun organisasion ta sventa li krixchanoetik ti mas xa ta 50 sjabilalike. Chichʼ pasel imprimir 22.4 miyon jujukoj. Jech xtok, li ta Alemaniae oy jlik revista ti ADAC Mortorwelt sbi ti tspasik imprimir 14 miyon jujukoje, yan li revista tslokʼesik ta China ti Gushi Hui (sloʼilal kuxlejal xchiʼuk yan kʼusitik) sbie tspasik imprimir 5.4 miyon.

Li periodiko ti mas toj ep chichʼ pasel imprimir ta Japone jaʼ li Yomiuri Shimbun sbie. Chichʼ pasel imprimir mas ta 10 miyon jujukoj.

Li revista ti tspasik li stestigotak Jeova eke mas to ep chichʼ jelubtasel ta jeltos kʼopetik. Yuʼun Li Jkʼel osil ta toyole chichʼ jelubtasel ta 190 jeltos kʼopetik, yan li ¡Despertad! chichʼ jelubtasel mas ta 80 kʼopetik. Pe li revista Reader’s Digest (ti Selecciones sbi ta españole) chichʼ jelubtasel ta 21 jeltos kʼopetik xchiʼuk chjel kʼusi chal ta jujun lum.

Oy to yan ti kʼu yuʼun mu kʼusi xkoʼolaj-o xtok li ¡Despertad! xchiʼuk Li Jkʼel osil ta toyole, jaʼ ti ta matanal takʼin chichʼ pasele. Muʼyuk kʼusi tspukbe skʼoplal sventa chichʼ chonel xchiʼuk muʼyuk chichʼ chonel.

Ti kʼu yuʼun chichʼ pasel imprimir Li Jkʼel osil ta toyole, ti muʼyuk bu pajem-o leʼ xa tal ta 1879, jaʼ ti chakʼ jnaʼtik li kʼusi chal Vivliae, pe jaʼ mas chalbe skʼoplal li Ajvalilal yuʼun Diose. Yan li revista ¡Despertad! jaʼ mas chalbe skʼoplal li kʼusitik x-ayan ta balumile xchiʼuk chalbe skʼoplal siensia sventa x-ayan xchʼunel koʼontontik ta stojolal li Jpasvaneje. Jech xtok, chakʼ kiltik kʼuxi xuʼ jtabetik sbalil li kʼusi chal Vivlia kʼalal chkakʼ ta jkuxlejaltike.