Mmaha Ufọkn̄wed
Se se oyomde anam mi
Ma ndisikpep n̄kpọ. Domo ndifiọk ufọn oro edibọde ito ufọkn̄wed. Ekeme ndidi ukwe ntak emi akpanade esịn idem ekpep ndusụk n̄kpọ idahaemi. Nte ededi, ndikpep nsio nsio n̄kpọ ayanam ọfiọk ekese n̄kpọ. Ayanam fi ‘akabade edi kpukpru n̄kpọ ọnọ kpukpru orụk owo,’ oyonyụn̄ anam ekeme ndinyene nneme ye mme owo emi ẹtode nsio nsio ebiet. (1 Corinth 9:22) Ke nsụhọde n̄kaha, ndikpep nsio nsio n̄kpọ ayanam ofori ukeme ukere n̄kpọ fo, ndien emi eyenyene ufọn ọnọ fi ke ini iso.
Ndika n̄wed ekeme nditie nte ndisiak akai n̄wọrọ—emekeme ndinam mbiba edieke ọfiọkde nnennen n̄kpọ oro akpanamde
Ma andikpep mbufo. Edieke ekerede ke nte andikpep mbufo ekpepde n̄kpọ efefek owo, wụk ekikere ke se ẹkpepde, kûwụk ke idemesie. Anaedi andikpep mbufo ekpekpep ukem n̄kpọ emi ke ubet ukpepn̄kpọ en̄wen ediwak ini. Ntre ekeme ndisọn̄ enye ndika iso n̄kpep n̄kpọ emi nsịn ufiop nte enye akanamde ke ini oro enye ọkọtọn̄ọde-tọn̄ọ.
Item: Wet n̄kpọ nịm, bụp enye mbụme ukpono ukpono, nyụn̄ wụt ke emenen̄ede ama se enye ekpepde oro. Mbon en̄wen ẹkeme ndikpebe utọ edu oro.
Ma mme n̄kpọ oro ekemede ndinam. Ufọkn̄wed ekeme ndinam ọfiọk mme n̄kpọ oro ekemede ndinam. Paul ekewet ọnọ Timothy ete: ‘Nam enọ Abasi emi afo ọkọbọde asak nte ikan̄.’ (2 Timothy 1:6) Anaedi ẹma ẹnọ Timothy ndusụk enọ emi ẹkesidade edisana spirit ẹnọ. Edi akana enye ada enọ emi anam n̄kpọ mbak editatak. Nte ededi, Abasi idisiakke-siak fi ibuot isịn ifiọkn̄wed. Edi enye ọnọ fi ukeme ye enọ emi ẹkpụhọrede ye eke mbon en̄wen. Ufọkn̄wed ekeme ndinam ọfiọk ukeme oro mûkpukereke ke emenyene.
