Sharin la ai lam hpe kaja ai hku mu mada u. Masa lam yawng hpe mu chye hkra shakut u. Sharin laika buk hta, nang hte n seng ai ni, yawm htum ya aten hta nang hte n seng shi ai lam ni lawm taw ai ngu nang shadu na re. Raitim, lam amyu myu lawm ai hpaji gaw, nang hpe mungkan a lam grau chye wa shangun ai. Shingdu labau amyu myu nga ai masha ni hte tsun shaga chye wa shangun ai majaw, “masha yawng mayawng hta lam yawng mayawng” byin wa shangun lu ai. (1 Korinhtu 9:22) Yawm htum, na a sawn sumru lu ai atsam rawt jat wa na re. Dai gaw prat ting hpe madi shadaw ya lu ai atsam ningja re.

Sara, saranum ni hpe kaja ai hku mu mada u. Sara, saranum ni a laika sharin ai ladat gaw lagawn na zawn wa ngu hkamsha yang, madung lam hpe myit maju jung u. Masha hpe myit maju hkum jung. Na a sara, saranum gaw dai laika hpe sha kahtap nna sharin wa ai lang, tsa hku rai nga sai hpe dum u. Dai majaw, ndai laika hpe sharin hpang wa ai aten na myit rawt ai lam hpe matut hkang da na matu loi na n re.

Hpaji jaw ai lam: Hkan matsing u. Grau nna chye mayu yang, hkungga ai hte san u. Sharin ya ai lam ni hpe myit lawm u. Myit lawm nna myit rawt ai gaw kaga ni hpe mung myit rawt shangun ai.

Na a atsam ni hpe kaja ai hku mu mada u. Jawng lung ai gaw makoi magap nga ai na a atsam ni hpe shapraw ya lu ai. Pawlu gaw Timohti hpang de ndai hku ka wa ai: “Nang hta rawng ai Karai Kasang a chyeju hpe naw wut shagrung ya na, ngai nang hpe shadum dat de ai.” (2 Timohti 1:6) Timohti gaw chyoi pra ai atsam chyeju kumhpa nkau lu da ai gaw dan dawng nga ai. Raitim, shi a chyeju kumhpa hpe shi shalat la ra ai. Rai yang she, dai atsam ni gaw n makoi magap taw na, majoi n byin mat na re. Jawng lung ai kaw na lu wa na atsam ni gaw Karai Kasang ding tawk jaw ai chyeju kumhpa gaw n re. Ratim, na a nga da chyalu atsam gaw laklai ai. Nga taw ai re pyi n chye ai dai atsam hpe mu nna shalat lu hkra, jawng lung ai gaw nang hpe karum ya lu ai.