ṬHALAITE ZAWHNA
School Kal Nuam Ka Ti Lo A Nih Chuan Engtin Nge Ni Ang?
Zirtîrtu strict tak. Rualpuite nêksâwrna. Exam harsa tak leh, homework tam lutuk te. School kal nuam i ti lo a nih chuan, chu chu hriatthiamawm tak a ni. a Tleirâwl Rachel-i b chuan heti hian a sawi:
“School kal ai chuan hmun dang kawiah pawh awm ka duh zâwk. Tuipui kama awm emaw, ṭhiante nêna hun hman dun emaw a nih loh leh, ka nu leh pate ei rawngbâwlpui leh in tihfai hnaa ṭanpui emaw chu ka duh zâwk!”
Rachel-i ang i nih ve chuan, i school kal kum chhûng chu i tawrh tlawk tlawk ngai tân ina inkhung ang mai niin i ngai ang. School-a i hun hmanna chu a êng zâwnga thlîr dânte a awm thei ang em?
I lo hria em? School kal chu a êng zâwnga i thlîr a nih chuan, dinhmunte chu i thunun thei ang a, school kalna chu tawrh tlawk tlawk ngai angin i thlîr tawh lo vang. Dik tak chuan, school chu i lo puitlin chhoh huna i mamawh thiamna nei tûra intahhriamna hmanrua ang a lo ni ang.
School kal chu a êng zâwnga thlîr tûr chuan, hêng a hnuaia thute hi ngaihven ang che:
I zirna. I zir nasat poh leh, nakin huna i hnathawhna leh i nun kawng hrang hranga i tawh mai theih harsatnate chu i chingfel thei lehzual ang a, mi dang i rinchhan a ngai lo vang. Heti hian inzâwt rawh, ‘School kal hunah hian nuam ka tih loh thiltih tûrte chu awm mah se, ka zirna aṭang hian eng hlâwknate nge ka hmuh?’
Bible thu bul: “Finna leh ngaihtuah thiamna dik tak chu vawng tlat rawh.”—Thufingte 3:21.
Hriat belh nân, “School-ah Hian Hlawhchham Ta I La, Engtin Nge Ni Ang?” tih thuziak chu en rawh.
I thiltih ṭhîn dân. School-a in thiltih ṭhîn dânte chuan hun vawng dik tûr te, mahni inthunun theih tûr te, leh mi taima tak ni tûr te—i lo puitlin huna i neih ngai miziate—nei tûrin a ṭanpui thei che a ni. Heti hian inzâwt rawh: ‘Eng kawngtein nge school-a kan thiltih ṭhîn dânte hian mahni inthunun thei tûr leh mi taima tak ni tûra min ṭanpui? Hemi kawngah hian eng hmasâwnnate nge i neih ngai?’
Bible thu bul: “Thawhrimna zawng zawngah hian hlâwkna a awm.”—Thufingte 14:23.
Hriat belh nân, “Ka Hun Hi Engtin Nge Ka Ruahman Theih?” tih thuziak chu en rawh.
Mi kawm dân thiamna. School-a i classmate-te nêna inkawmna chuan lainatna leh mi dangte zah thiamna nei tûrin a ṭanpui thei che a. “Mite nêna inbiak pawh dân zir thiam hi history leh science lam zirna tlukin a pawimawh a. Chu chu i dam chhûnga i hman tûr thiamna a ni,” tiin ṭhalai Joshua-a chuan a sawi. Heti hian inzâwt rawh, ‘School-ah hian mi dangte—ṭobul leh ka thurin nêna inang lo mite pawh tiamin—nêna inbiak pawh dân chungchângah eng nge ka zir?’
Bible thu bul: “Mi zawng zawng nêna inrem . . . rawh u.”—Hebrai 12:14.
Hriat belh nân, “Engtin Nge Mite Biak Pawh Thiamna Hi Ka Tihhmasâwn Theih Ang?” tih thuziak chu en rawh.
I hma lam hun. School kalna chuan i thiamnate leh chumi mila thiltumte insiam tûrin a ṭanpui thei che a. Nula Brooke-i chuan heti hian a sawi: “Keimah angin, school i zawh hunah hna eng emaw tak atân training i nei pawh a ni thei a, chumi atân a tlintîr ang che,” tiin. Heti hian inzâwt rawh: ‘School ka zawh hunah engtin nge kan inchâwm ang? Ka hnathawh tûr atân ka lo inzir lâwk tih engtin nge ka chian theih ang?’ tiin.
Bible thu bul: “I kê atân kawng tirualrem la.”—Thufingte 4:26.
