യുവജനങ്ങൾ ചോദിക്കുന്നു
സ്കൂളിൽ പോകാൻ എനിക്ക് ഒരു ഇഷ്ടവും ഇല്ലെങ്കിലോ?
ടീച്ചർമാരുടെ കടുംപിടിത്തം, കൂട്ടുകാരിൽനിന്നുള്ള സമ്മർദം, പരീക്ഷയുടെ ടെൻഷൻ, ഒരുകുന്ന് ഹോംവർക്ക്. . . ഇതെല്ലാം കൂടിയാകുമ്പോൾ സ്കൂളിൽ പോകുന്നതേ ഇഷ്ടമല്ല എന്നു നിങ്ങൾ പറഞ്ഞാലും അതിൽ അത്ഭുതമില്ല. a റേയ്ച്ചൽ b എന്ന ഒരു കൗമാരക്കാരി പറയുന്നു:
“സ്കൂളിൽ അല്ലാതെ വേറെ എവിടെ പോകാനും എനിക്കു കുഴപ്പമില്ല. ബീച്ചിൽ പോകാനോ, കൂട്ടുകാരുടെ കൂടെയായിരിക്കാനോ, ഇനി വീട്ടിൽ പപ്പയെയും മമ്മിയെയും എന്തെങ്കിലും ചെയ്ത് സഹായിക്കാനോ ആണെങ്കിൽപ്പോലും കുഴപ്പമില്ല.”
റേയ്ച്ചലിനെപ്പോലെയാണോ നിങ്ങൾക്കും തോന്നുന്നത്? ജയിലിൽനിന്ന് പുറത്തിറങ്ങാൻ കാത്തിരിക്കുന്ന ഒരാളെപ്പോലെ സ്കൂൾവർഷങ്ങൾ എങ്ങനെയെങ്കിലും ഒന്ന് അവസാനിച്ച് കിട്ടിയാൽ മതി എന്നാണോ നിങ്ങളുടെ മനസ്സിൽ? സ്കൂളിൽ പോകുന്നതിനെക്കുറിച്ച് പോസിറ്റീവായി ചിന്തിക്കാൻ നിങ്ങളെ സഹായിക്കുന്ന എന്തെങ്കിലുമുണ്ടോ?
നിങ്ങൾക്ക് അറിയാമോ? സ്കൂളിൽ പോകുന്നതിനെക്കുറിച്ച് നിങ്ങൾക്കു ശരിയായ വീക്ഷണമുണ്ടെങ്കിൽ പോകാതെ പറ്റില്ലല്ലോ എന്ന് ഓർത്തല്ല, പകരം ഇഷ്ടത്തോടെ സ്കൂളിൽ പോകാൻ നിങ്ങൾക്കു പറ്റും. ശരിക്കും പറഞ്ഞാൽ, വലുതാകുമ്പോൾ നിങ്ങൾക്കു വേണ്ടിവരുന്ന കഴിവുകൾ വളർത്തിയെടുക്കാനും മെച്ചപ്പെടുത്താനും സഹായിക്കുന്ന ഒരിടമാണ് സ്കൂൾ.
സ്കൂളിൽ പോകുന്നതിനെക്കുറിച്ച് ഒരു നല്ല വീക്ഷണമുണ്ടായിരിക്കാൻ ഇനി പറയുന്ന കാര്യങ്ങളെക്കുറിച്ച് ഒന്നു ചിന്തിച്ചുനോക്കൂ:
വിദ്യാഭ്യാസം. കൂടുതൽ കാര്യങ്ങൾ പഠിക്കുന്നതിലൂടെ, പിന്നീട് ഒരു ജോലി കിട്ടുമ്പോഴോ ജീവിതത്തിലെ മറ്റു സാഹചര്യങ്ങളിലോ എന്തെങ്കിലും പ്രശ്നങ്ങളുണ്ടാകുമ്പോൾ നിങ്ങൾക്കുതന്നെ അതു പരിഹരിക്കാൻ പറ്റും. എപ്പോഴും അതിനു മറ്റുള്ളവരെ ആശ്രയിക്കേണ്ടിവരില്ല. സ്വയം ചോദിക്കുക, ‘സ്കൂളിൽ എനിക്ക് ഇഷ്ടമില്ലാത്ത പല കാര്യങ്ങളുണ്ടെങ്കിലും അവിടെനിന്ന് പഠിക്കുന്ന കാര്യങ്ങൾ എനിക്ക് എങ്ങനെയാണ് ഉപകാരപ്പെടുന്നത്?’
ബൈബിൾതത്ത്വം: “ജ്ഞാനവും ചിന്താശേഷിയും കാത്തുസൂക്ഷിക്കുക.”—സുഭാഷിതങ്ങൾ 3:21.
കൂടുതൽ വിവരങ്ങൾക്ക്, “എങ്ങനെയാ പരീക്ഷയ്ക്കൊന്നു ജയിക്കുക?” എന്ന ലേഖനം കാണുക.
നല്ല ശീലങ്ങൾ. സ്കൂൾക്കാലത്ത് നിങ്ങൾ വളർത്തിയെടുക്കുന്ന നല്ല ശീലങ്ങൾ സമയം നല്ല രീതിയിൽ ഉപയോഗിക്കാനും അച്ചടക്കമുള്ളവർ ആയിരിക്കാനും കഠിനാധ്വാനികൾ ആയിരിക്കാനും നിങ്ങളെ സഹായിക്കും. ഈ ഗുണങ്ങളെല്ലാം വലുതായി കഴിയുമ്പോൾ നിങ്ങൾക്ക് ഒരുപാടു പ്രയോജനം ചെയ്യും. സ്വയം ചോദിക്കുക: ‘സ്കൂളിൽ പോകുന്നതിലൂടെ കിട്ടുന്ന നല്ല ശീലങ്ങൾ അച്ചടക്കമുള്ള ഒരാളായിരിക്കാനും കഠിനാധ്വാനം ചെയ്യുന്ന ഒരാളായിരിക്കാനും എന്നെ സഹായിക്കുന്നത് എങ്ങനെയെല്ലാമാണ്? ഈ കാര്യങ്ങളിലൊക്കെ എനിക്ക് എന്തെല്ലാം പുരോഗതി വരുത്താനാകും?’
ബൈബിൾതത്ത്വം: “കഠിനാധ്വാനം ചെയ്താൽ പ്രയോജനം ലഭിക്കും.”—സുഭാഷിതങ്ങൾ 14:23.
കൂടുതൽ വിവരങ്ങൾക്ക്, “എനിക്ക് എങ്ങനെ സമയം കൈപ്പിടിയിൽ ഒതുക്കാം?” എന്ന ലേഖനം കാണുക.
മറ്റുള്ളവരുമായുള്ള ബന്ധം. സ്കൂളിൽ നിങ്ങൾ മറ്റു കുട്ടികളുമായി ഇടപെടേണ്ടിവരും. അതിലൂടെ മറ്റുള്ളവരോടു സഹാനുഭൂതിയും ബഹുമാനവും ഒക്കെ കാണിക്കാൻ നിങ്ങൾ പഠിക്കും. ചെറുപ്പക്കാരനായ ജോഷ്വ പറയുന്നു: “മറ്റുള്ളവരുമായി ആശയവിനിമയം ചെയ്യാൻ പഠിക്കുന്നതു ചരിത്രവും ശാസ്ത്രവും ഒക്കെ പഠിക്കുന്നതുപോലെതന്നെ പ്രധാനമാണ്. ജീവിതകാലം മുഴുവൻ നിങ്ങൾക്ക് ആ കഴിവ് ആവശ്യം വരും.” സ്വയം ചോദിക്കുക, ‘മറ്റുള്ളവരുമായി ഒത്തുപോകാൻ, പ്രത്യേകിച്ച് എന്റേതിൽനിന്ന് വ്യത്യസ്തമായ ജീവിതസാഹചര്യങ്ങളും വിശ്വാസങ്ങളും ഉള്ളവരുമായിപ്പോലും ഒത്തുപോകാൻ എന്നെ സഹായിക്കുന്ന എന്തെല്ലാമാണ് സ്കൂൾജീവിതം എന്നെ പഠിപ്പിച്ചിട്ടുള്ളത്?’
ബൈബിൾതത്ത്വം: “എല്ലാവരുമായും സമാധാനത്തിലായിരിക്കാൻ പരിശ്രമിക്കുക.”—എബ്രായർ 12:14.
കൂടുതൽ വിവരങ്ങൾക്ക്, “സംസാരിക്കാനുള്ള കഴിവ് എനിക്ക് എങ്ങനെ മെച്ചപ്പെടുത്താം?” എന്ന ലേഖനം കാണുക.
ഭാവി ജീവിതം. സ്കൂൾക്കാലം, നിങ്ങളുടെ കഴിവുകൾ തിരിച്ചറിയാനും അതനുസരിച്ചുള്ള ലക്ഷ്യങ്ങൾ വെക്കാനും നിങ്ങളെ സഹായിക്കും. ചെറുപ്പക്കാരിയായ ബ്രൂക്ക് പറയുന്നു: “പഠിക്കുന്ന സമയത്ത് ഏതെങ്കിലും ഒരു പ്രത്യേകമേഖലയിൽ കൂടുതൽ പരിശീലനം നേടിയെടുക്കാൻ നിങ്ങൾക്കു കഴിഞ്ഞേക്കും. ഞാൻ അതാണ് ചെയ്തത്. അങ്ങനെയാകുമ്പോൾ പഠിച്ച് കഴിയുമ്പോൾത്തന്നെ നിങ്ങൾക്ക് ഒരു ജോലി നേടാനാകും.” സ്വയം ചോദിക്കുക: ‘സ്കൂൾപഠനം കഴിഞ്ഞ് സ്വന്തം കാലിൽ നിൽക്കുന്നതിന് എന്തു ജോലി ചെയ്യാനാണ് എന്റെ പ്ലാൻ?, ആ ജോലി കിട്ടാൻ സഹായിക്കുന്ന വിദ്യാഭ്യാസം നേടാൻ എനിക്ക് എന്തു ചെയ്യാം?’
ബൈബിൾതത്ത്വം: “നീ നടക്കുന്ന വഴികൾ ഉത്തമമെന്ന് ഉറപ്പിക്കുക.”—സുഭാഷിതങ്ങൾ 4:26, പി.ഒ.സി.