Barutiši ba go tiiša letsogo. Kgateletšo ya dithaka. Ditlhahlobo tše thata le mošomo wa gae o montšhi. Go ka ba le mabaka a kwagalago ao a dirago gore o se rate sekolo. a Rachel b e lego moswa yo a lego mahlalagading o re:

 “Nka kgetha go ba lefelong le ge ele lefe go ena le gore ke ye sekolong. Go kaone gore ke ye lewatleng, ke be le bagwera ba ka goba ke thuše batswadi ba ka go apea le go hlwekiša!”

 Ge eba o ikwa go swana le Rachel, o ka bona eka sekolo se swana le kgolego moo o tlago go lokollwa ka morago ga mengwaga ya ge o feditše dithuto tša gago. Na go na le tsela e kaone yeo ka yona o ka lebelelago nako yeo o e fetšago o le sekolong?

 Na o be o tseba? Ge o ka ba le pono e botse ka sekolo, seo se tlo go thuša gore o seke wa lebelela sekolo e le teko yeo o swanetšego go e kgotlelela. Ka mantšu a mangwe, sekolo se tlo go thuša gore o be le bokgoni bjo o tlo bo hlokago ge o šetše o godile.

 Gore o be le pono e botse ka sekolo, leka dintlha tše di latelago:

 Thuto ya gago. Dilo tšeo o ithutago tšona sekolong, di tlo go thuša go rarolla mathata ao o tlago go kopana le ona ge o šetše o šoma le go o thuša go rarolla mathata a mangwe ka kakaretšo, go ena le go dula o ithekga ka batho ba bangwe gore ba go thuše. Ipotšiše gore, ‘Le ge eba go na le dilo tšeo ke sa di ratego ka sekolo, ke holega bjang ge ke tsena sekolo?’

 Molao wa motheo wa Beibele: “Dula o le bohlale gomme o šireletše monagano wa gago.”—Diema 3:21.

 Mekgwa ya gago. Mekgwa yeo o ithutago yona sekolong, e tlo go thuša gore o diriše nako ya gago ka bohlale, o be le boitshwaro ebile o šome ka thata. Dika tše di tlo go thuša ge o gotše. Ipotšiše gore: ‘Tsela yeo ke dirago dilo ka yona ge ke le sekolong, e nthuša bjang go ba le boitshwaro le go šoma gabotse? Ke kae mo nka kaonefatšago gona?’

 Molao wa motheo wa Beibele: “Go šoma ka thata go a hola.”—Diema 14:23.

 Tswalano ya gago le batho ba bangwe. Tsela yeo o dirišanago le barutwana mmogo le wena sekolong, e ka go thuša gore o be le kwelobohloko le go hlompha batho ba bangwe. Moswa yo a bitšwago Joshua o re “Go ithuta go boledišana le batho gabotse go bohlokwa go swana le histori le saense. Ke bokgoni bjo o tlago go bo diriša bophelong bja gago ka moka.” Ipotšiše gore, ‘Ke ithutile eng sekolong ka go dirišana le batho ba bangwe gabotse le ge maemo a bona le ditumelo tša bona di sa swane le tša ka?’

 Molao wa motheo wa Beibele: “Phegelelang khutšo le batho bohle.”—Baheberu 12:14.

 Bokamoso bja gago. Sekolo se ka go thuša gore o lemoge bokgoni bjo o nago le bjona le gore o ka dira eng gore o bo fihlelele. Lekgarebe la moswa leo le bitšwago Brooke o re: “Go swana le nna, o ka kgona le go hwetša tlwaetšo yeo e tlago go go thuša gore o hwetše mošomo ka morago ga dithuto tša gago.” Ipotšiše gore: ‘Ke tlo kgona go itlhokomela bjang ka morago ga ge ke feditše dithuto tša ka? Nka ithuta eng sekolong seo se sepedišanago le mošomo woo?’

 Molao wa motheo wa Beibele: “Tloša dilo tšeo di ka dirago gore o kgopše tseleng ya gago.”—Diema 4:26, Beibele ya Phetolelo ya Lefase le Leswa.