Furro-fuuqqo hoˈlanno rosiisaancho. Darawo abbitanno qarra. Fonqolu yanna yaaddo; mini loosi batinye. Roso giwisinoheha ikkiro, mayira giwitto diyinannihe. Reecheli a yinanni wedellitte togo yitino:

 “Rosu minella ikka hoogiro wolewa ayewano ikkiro haˈreemma. Rosu minira haˈrammante, wayi laga woy jaallaˈyawa haˈrummaro woy isinni mine sagale qishanninna mine feyanni maateˈya kaaˈlummaro woyyannoe!”

 Atino Reecheli gedeetiro, rosu mini usuru mini gede ikkahera dandaanno; hakko daafira, ‘Konni usuru mininni fuleemmohu maassameemmo woyite callaati’ yite hedattoha ikkara dandaanno. Ikkina rosu mine sayisatto yanna daafira, dancha danchare heda dandaattohu hiittoonniiti?

 Ati tenne afootto? Rosu mini daafira gara ikkitino lao heedhuhero, rosu minira haˈra hasiissinohe daafira calla ikkikkinni baxxe haˈrattoha ikkatto. Qoleno rosu lophite jawa ikkatto woyitira hasiissannohe dandoo lossiˈratto gede kaaˈlannohe uduunnicho ikkannohe.

 Rosu minira gara ikkitino lao heedhannohe gede, aante noo coyibba hedate woˈnaali:

 Qajeelsha. Roso rositto kiiro, albillitte loosu bayicho iillannohe qarranna heeshshokki giddo tuncu yaannoheha wole qarra tirate roore qajeeloottoha ikkatto; tini qolte kaittorira baalaho mannu kaaˈlo agadhattokki gede kaaˈlitannohe. Ateneeto togo yite xaˈmi: ‘Rosu mine baxisannoekkihu mitu coyi nooha ikkirono, heeshshoˈyara kaaˈlannore maa maa rosanni noommo?’

 Qullaawu Maxaafi biddishsha: “Beettoˈya ballo, egennonna wodancha seekkite cuˈmiˈri.”—Lawishsha 3:21.

 Dancha rosicho. Rosu mine nootto woyite lossiˈratto rosichi yanna danchu garinni horoonsiˈratto gara afatto gede, umokki qeeˈlattoha ikkatto gedenna loosoho diinaggaawattoha ikkatto gede kaaˈlannohe; tini akatta lophite jawa ikkatto woyitira lowo geeshsha hasiissannohete. Ateneeto togo yite xaˈmi: ‘Rosu mini umoˈya qeeˈleemmoha ikkeemmo gedenna worba loosaasincho ikkeemmo gede kaaˈlanni nooehu hiittoonniiti? Tenne akatta roore woyyeessiˈra dandeemmohu ma garinniiti?’

 Qullaawu Maxaafi biddishsha: “Diinaggaambe loosiˈra qiniite uyitanno.”—Lawishsha 14:23.

 Wolootu ledo noohe aante. Ledokki rossannori ledo noohe aante, manna mararattohanna ayirrisattoha ikkatto gede kaaˈlitannohe. Jooshuwa yinanni beetti togo yiino: “Xaggenna sayinse rosa hasiissannota ikkitinonte gede, mannu ledo hasaambanni gara rosano hattonni hasiissannote.” Isi lede “Mannu ledo hasaawa rosa, heeshshonke diro woˈma kaaˈlitannonke dandooti” yiino. Ateneeto togo yite xaˈmi: ‘Rosu mine, lophitino garinna ammaˈnonsa anetewiinni baxxitinota ikkituro nafa wolootu ledo sumuu yee heeˈrate kaaˈlannoere maa rosoommo?’

 Qullaawu Maxaafi biddishsha: “Mannu baalu ledo keere heeˈrate . . . jawaatte!”—Ibiraawoota 12:14.

 Albillittete heeshshokki. Rosu, dandookki badde afatto gedenna dandookki ledo sumuu yitanno mixo fushshiˈratto gede kaaˈlannohe. Biruuki yinanni beetto togo yitino: “Ani assummante gede, mitto rosu gola doodhitine rosa dandiitinanniha ikkara dandaanno; hatto assaˈne roso guddine maassantinihu gedensaanni loosoho ikkadda ikkitinanni gede assitannoˈne.” Ateneeto togo yite xaˈmi: ‘Roso gude maassamummohu gedensaanni, heeshshote hasiisannoere afiˈrate hiittoo looso looseemmo? Hattoo looso afiˈrate kaaˈlannoe gedee roso rosa dandeemmohu hiittoonniiti?’

 Qullaawu Maxaafi biddishsha: “Assattore buuxxe afittoro, loosattori gara ikkannohe.”—Lawishsha 4:26.