Ol tisa i strong tumas. Presa bilong ol wanlain. Eksam i givim presa, na planti homwok. Sapos yu tok yu no laikim skul, ating i gat risen na yu tok olsem. a Wanpela tineja nem bilong em Rachel,  b i tok:

 “Mi laik stap long narapela hap na i no long skul. Mi laik stap long nabis o wantaim ol pren bilong mi o helpim papamama long kuk na klinim haus!”

 Sapos yu pilim wankain olsem Rachel, ol yia yu stap long skul i olsem yu stap long kalabus na wet long taim bilong gretiuesen na bai yu ken stap fri. Olsem wanem? I gat narapela gutpela rot long tingim ol yia bilong yu long skul?

 Yu save long dispela? Taim yu kisim stretpela tingting long skul, yu bai bosim ol samting i kamap na yu no lukim skul olsem wanpela samting bilong givim hevi long yu. Skul bai stap olsem wanpela tul we bai helpim yu long kisim ol save yu nidim long taim yu go bikpela.

 Bilong kisim stretpela tingting long skul, tingim ol dispela samting:

 Ediukesen bilong yu. Taim yu wok long kisim save, dispela inap helpim yu long stretim ol hevi we bai kamap bihain long ples wok na ol narapela samting long sindaun bilong yu, na oltaim yu no inap wet long ol narapela long helpim yu. Askim yu yet, ‘Maski i gat ol samting long skul we mi no laikim, mi inap kisim wanem ol helpim long ol samting mi lainim?’

 Stiatok bilong Baibel: “Banisim gut savetingting na pasin bilong wokim gut tingting.”​—Provep 3:21.

 Ol samting yu save mekim. Ol samting yu save mekim long taim yu go long skul inap lainim yu long yusim gut taim, bosim bel, na lain long givim bel long mekim wok—ol pasin yu mas i gat long taim yu go bikpela. Askim yu yet: ‘Long wanem ol rot pasin bilong go long skul inap helpim mi long bosim bel na mekim gut wok? Mi inap mekim wanem ol samting na bai mi kamap gutpela moa long ol dispela samting?’

 Stiatok bilong Baibel: “Taim man i wok hat long olgeta kain wok, em bai kisim gutpela samting.”​—Provep 14:23.

 Pasin pren bilong yu wantaim ol narapela. Pasin bilong yu long mekim ol samting wantaim ol wanklas long skul inap helpim yu long kisim pasin bilong rispek na pilim tingting bilong ol narapela. Yangpela man nem bilong em Josua, i tok: “Pasin bilong lain long toktok wantaim ol man em bikpela samting wankain olsem yu lainim histori na saiens. Em save yu inap yusim long laip olgeta bilong yu.” Askim yu yet, ‘Mi lainim wanem ol samting long skul we i helpim mi long stap gut wantaim ol narapela—maski sampela em sindaun o bilip bilong ol i no wankain long mi?’

 Stiatok bilong Baibel: “Wok strong long stap bel isi wantaim olgeta manmeri.”​—Hibru 12:14.

 Long bihain. Skul inap helpim yu long luksave long ol samting yu inap mekim gut na long putim ol mak we i stret. Yangpela meri nem bilong em Brooke, i tok: “Yu inap kisim sampela moa trening long wanpela wok, olsem mi bin mekim, na taim yu grediuet, yu inap long kisim wanpela wok.” Askim yu yet: ‘Hau bai mi inap sapotim mi yet bihain long mi grediuet? Hau bai mi ken save olsem samting mi lainim long skul inap helpim mi long painim wanpela wok mani?’

 Stiatok bilong Baibel: “Tingting gut long wokabaut bilong yu.”​—Provep 4:26, Buk Baibel.