YELAGATI OYCHCHIYO OYSHAA
Taani Timirtte Keettaa Biyogaa Dosana Xayikko Waatoo?
Hanqqettiya asttaamareta. Laggeti iitabawu denttettiyogaa. Timirtte keettan imettiya unˈˈissiya paacetanne keehi daro so oosuwa. Neeni timirtte keettaa biyogaa dosana xayikko, hegaayyo loˈˈo gaasoy deˈana danddayees. a Layttay 19 gidido Racheela b hagaadan gaasu:
“Taani timirtte keettaappe harasaa awanne biyakko ixxikke. Timirtte keettaa biyogaappe, abbaa doonaa biyakko woy ta laggetuura wodiya aattiyakko woy ubba tana yelidaageeta qumaa kattiyogan woy keettaa geeshshiyogan maaddiyakko dosays!”
Neeyyokka Racheeliigaadan siyettikko, neeni timirttiya wurssada shemppana gakkanaashin timirtte keettan takkiyo layttaa qasho keettadan xeellana danddayaasa. Neeni timirtte keettan takkiyo wodiyabaa loˈˈobaa qoppana danddayay?
Hagaa eray? Neeni timirtte keettaabaa loˈˈobaa qoppiyo wode, oottiyobaa doorananne timirtte keettaa neeni gencciyo metiya sohodan xeelliyogaa aggana danddayaasa. Timirtte keettay neeni gasttiyo wode goˈettiyo eraa demmanaadaaninne gujjanaadan oottiyaba gidana.
Timirtte keettaa loˈˈobadan xeellanawu kaallidi deˈiyabata qoppa:
Ne timirttiya. Neeni timirttiyan sugiyogee, sinttappe ooso sohuwaninne deˈuwan hara ogetun metoy gakkiyo wode ubbatoo haratu maaduwa oychchiyogaappe nerkka giigissanaadan maaddana. ‘Timirtte keettaa biyogaa dosennaadan oottiyabati deˈikkokka, taani ta timirttiyappe demmiyo goˈˈay aybee?’ gaada nena oychcha.
Geeshsha Maxaafaa maaraa: “Lo77o aadhdhida eratettaanne adussi qoppiyoogaa naaga.”—Leemiso 3:21.
Gujjada eranawu, “Taani Timirttiyan Kunddikko Shin?” giya huuphe yohuwa xeella.
Ne meezetidobata. Neeni timirtte keettan meezetiyo loˈˈobati ne wodiya waata goˈettanaakko, nena nerkka seeriyagaa gidanaadaaninne minna oottiyo meeziya, hegeekka neeni gasttiyo wode koshshiya eeshshata tamaaranaadan maaddana. Nena hagaadan oychcha: ‘Taani timirtte keettan meeze oottiyo loˈˈobati tana seeriyagaanne loˈˈo oosanchcha gidanaadan tana maaddiyoy ayba ogetuunee? Hegaara gayttidaagan ay giigissana danddayiyanaa?’
Geeshsha Maxaafaa maaraa: “Minnidi oottidoban ubban go77ai de7ees.”—Leemiso 14:23.
Gujjada eranawu, “Ta Wodiya Waata Loytta Goˈettana Danddayiyanaa?” giya huuphe yohuwa xeella.
Neeyyo haratuura deˈiya gaytotettaa. Neeni timirtte keettan nenaara tamaariyageeta oyqqiyo ogee, haratuyyo qarettiyagaanne eta bonchchiyagaa gidanaadan maaddana danddayees. Joshuwa giyo issi yelagay hagaadan giis: “Asaara waati haasayanaakko meezetiyogee taarikiyanne saynisiya timirttiyadan keehi koshshiyaba. Hegee neeni ne deˈo laytta ubban goˈettanaba.” Nena hagaadan oychcha: ‘Taani haratuura, ubba eti diccido hanotaynne ammaniyobay taagaappe dummatiyogeetuura sarotettan deˈiyogaabaa timirtte keettan ay tamaaridanaa?’
Geeshsha Maxaafaa maaraa: “Asa ubbaara saro de7anau minnite.”—Ibraawe 12:14.
Gujjada eranawu, “Asaara Haasayiyogan Waana Qara Gidana Danddayiyanaa?” giya huuphe yohuwa xeella.
Ne sinttanaa. Timirttee neeni ne abbiya eranaadaaninne hegaara maayiya halchchota kessanaadan maaddana danddayees. Bruko giyo yelaga maccaasiya hagaadan gaasu: “Taagaadan neenikka issiban loohana danddayaasa, yaatiyogan neeni timirttiya wurssiyo wode ooso demmana danddayaasa.” Nena hagaadan oychcha: ‘Timirttiya wurssiyo wode ay ooso oottana danddayiyanaa? Taani tamaaridobay hegaa mala oosuwa oottanawu waati maaddanee?’
Geeshsha Maxaafaa maaraa: “Ne gediyaassi ogiyaa salallissa.”—Leemiso 4:26.
