Ka. Mbimbiliya yakwamba ngwo twatamba kulemba wika kuli Zambi, mu jina lia Yesu. Yesu kalwezele tumbaji twenyi ngwenyi: “Kashika lembenu ngwenu, Tata nuli mu malilu, jina lienu lipwe lisandu.” (Mateu 6:9) Iye kakalongesele ngwenyi tumbaji twenyi te katamba kulemba kuli asandu, kuli angelo hanji kuli tuzambi akwo. Alioze kuli Zambi wika.

 Yesu kambile nawa kuli tumbaji twenyi ngwenyi: “Ye jila yami, ni we umwenemwene, ni we mwono. Niumwe meza kuli Tata shina ni yami.” (Yoano 14:6) Yesu wika mwe uli ni ulite wa kutumanyinako hanji ngwetu kutuhanjikilako kuli Yehova.—A-Hepreu 7:25.

Shina twatamba kulemba kuli Zambi ni kuli asandu?

 Muze Satana esekele Yesu, Yesu yamukumbulula ngwenyi: “Ukawayile Mwene Zambi ye. Iye wika ukamulingile.” (Mateu 4:10) Zambi kakushimbwila tumuwayile wika iye, chino chinalumbunuka ngwo twatamba kulemba wika kuli iye.—Izaia 48:11.

 Kulemba kuli chitangiwa cheswacho ngwe, asandu hanji angelo, chili kutuka Zambi. Muze postolo Yoano esekele kuwayila umwe mungelo, mungelo wacho yamulweza ngwenyi: “Kanda uchilinga! Yami nguli ndungo-ni-mukwenu, ni ndungo-ni-mukwo wa mandumbu je, waze ali ni shindakenyo ya Yesu. Wayila Zambi.”—Usolwelo 19:10.