Makawẽe. Bibliaba jaradeawẽa dachirãmaa chi santorãmaa wiɗiɗai baita, dachi bari ʉtaa wiɗiɗayu Dachi Akõremaaburu Jesusɗeeba. “Naka ʉtaa wiɗíbaɗa, Jesusba jarasii ichi kaaɗe ãda nureerãmaa: Dai Akõre ʉtʉ bajãaɗe ɓuu, bichi trʉ̃ ʉ̃rʉbena miadaa jaraɗai idarabirãaba” (Mateo 6:9). Jesusba jaraabasia dachia santorãmaa wiɗiɗayu, angelerãmaa maebʉrã junebena ẽbẽra Dachi Akõrewẽe niimaa wiɗiɗai.

 Jesús biɗa nau jarasia: “Mau o mʉʉbʉ. Mʉʉɗeeba Dachi Akõre biawãra unu panuu mauɗe chokae ɓuai uru panuu. Mʉwãebʉrã aɓa biɗa mʉ Chachamaa poyaa neebai” (Juan 14:6 Biblia Chamí, WPS). Jesusburu dachi ãrĩãdu aiɗayu Jeowaba ʉtaa wiɗibudau ũriyua (Hebreos 7:25).

¿Dachi Akõremaa ʉtaa wiɗipeɗa, mauɗe santorãmaa biɗa wiɗii ɓue?

 Chi 10 mandamientorãɗebenaɗe aɓa ɓuuɗe, Dachi Akõreba naka asii: “Mʉ Jeowabʉ, mʉa mʉʉmaaburu wiɗiɗayua jara ɓua” (Éxodo 20:5). ¿Sakayua Dachi Akõre nau wiɗi ɓua? Chi dore ɓʉ kuɓuu aɓa ɓuu Biblia de América abadauɗebenaba jara ɓua: “Ichidu Akõre aɓa ɓuu, ichi kĩra wãʼãe bai”. Mauɗe ichia kʉ̃ria ɓuu aɓa ichidu kʉ̃riapeɗa ũriyua, mauɗe ʉtaa wiɗiiruu jãu siɗa kʉ̃ria ũriɗai (Isaías 48:11).

 Dachia wiɗiɗarã aɓabena Dachi Akõrewẽe niimaa ángel maebʉrã santomaa, Dachi Akõre ãrĩãdu kĩruyua. Apocalipsisɗe jara ɓuu Juanba õdarrɗe akʉ ɓeepeɗa ángel kʉ̃ria ũribasii, maamina chi angelba ichi iaɗaapeɗa naka asia: “Naka aserãaba, mʉ bichi kõpaero bapeɗa mauɗe bichi ãbarãɗe, jãarã Jesús baare jipa ãda nureabadaa. Dachi Akõreburu kʉ̃ria ũri baraai” (Apocalipsis 19:10).