Oho. Bible no ma yehu dɛ, ɔsɛ dɛ yɛbɔ Nyankopɔn nkotsee mpaa. Na sɛ yɛreyɛ dɛm so a, ɔsɛ dɛ yɛdze fa Jesus no do. Jesus kãa kyerɛɛ n’esuafo no dɛ: “Dɛm ntsi hom nsɔr dɛ iyi: Hɛn Egya a ewɔ sor, wo dzin ho ntsew.” (Matthew 6:9) Jesus annkã annkyerɛ n’esuafo no da dɛ wɔmmbɔ ahotseweefo, abɔfo anaa obi fofor biara mpaa. Nyankopɔn nkotsee na ɔkãa dɛ wɔmbɔ no mpaa.

 Jesus sanee so kãa kyerɛɛ n’ekyirdzifo no dɛ: “Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do. (John 14:6) Jesus nkotsee na Nyankopɔn eyi no dɛ ɔnserɛ mma hɛn.​—Hebrewfo 7:25.

Sɛ mobɔ Nyankopɔn mpaa na sɛ mesan so bɔ ahotseweefo mpaa so ɛ?

 Nyankopɔn kãa no wɔ Mbransɛm Du no mu dɛ: “Na emi Ewuradze wo Nyankopɔn meyɛ Nyame nyinkufo.” (Exodus 20:5) Ebɛn kwan do na Nyankopɔn yɛ “nyinkufo”? Sɛ ehwɛ New World Translation no mu a, ɔkyerɛ dɛm asɛmfua yi ase dɛ “Nyankopɔn mmpɛ dɛ ɔnye obi kyɛ no som.” Nyankopɔn hwehwɛ dɛ yɛsom ɔno nkotsee. Ntsi biribiara a ɔfa ɔsom ho, a mpaabɔ ka ho dze, ɔsɛ dɛ yɛdze ma Nyankopɔn nkotsee.​—Isaiah 48:11.

 Nyankopɔn n’enyi renngye ho dɛ yɛbɔbɔ obi fofor, ahotseweefo anaa abɔfo a wɔyɛ krɔnkrɔn no mpaa. Aber a ɔsomafo John yɛɛ dɛ ɔrobɔsom ɔbɔfo bi no, ɔbɔfo no amma ɔannsom no, mbom ɔkãa kyerɛɛ no dɛ: “Mma nnyɛ dɛm: meyɛ w’ewurakowaa nye wo nuanom a wokura Jesus dase mu no dze: kotow Nyankopɔn.”​—Nyikyerɛ 19:10.