Nnojotsü süküjain tü Bibliakat waresaajüinjanain sümüin niyaakua wanee santo. Nia neʼe woʼuraajüinjachika amüin Maleiwa nükajee Jesús. «Müshi Jesús namüin na nikirajüinkana: ‹Müinjatü juʼuraajia: «Washi chakai iipünaa, kojuta putuma tü pünüliakat»›» (Mateo 6:9, Biblia de América [BA]). Nnojotsü nüküjain Jesús woʼuraajüinjanain sümüin ayaakuaa, nümüin wanee aapiee otta sümüin eekai nnojolin niain Maleiwa.

 Anuu sooʼomüin nünüiki Jesús: «Taya tayakai chi wopukai, tü shiimainkat otta tü kataakalü oʼu. Nnojoleerü jaralüin antüin eemüin chi Tashikai nnojoire tayain antirüin nünainmüin» (Juan 14:6, BA). Nia neʼe Jesús eeka süpüla asoutuin waaʼu nümüin Maleiwa süka niain aapünüin amüin laülawaa (Hebreokana 7:25).

¿Eeshiiche süpüla woʼuraajüin nümüin Maleiwa jee sümüin tü ayaakuaakalüirua?

 Anuu wanee soʼutku nünüiki Maleiwa saʼakajee tü Poloosükat Pütchi aapünakat nümüin Moisés: «Taya tayakai chi Senyotkai otta tayainjachi aʼwaajünaka tamüiwaʼa» (Éxodo 20:5, BA). ¿Jamaluʼulu nuʼwaajünüinjachin Maleiwa nümüiwaʼa? Anuu sünüiki wanee noota süchiki tia wetsiikulokot suluʼu Biblia de América: «Nia neʼe Maleiwa aʼwaajünajachika nümüiwaʼa, nnojotsü aʼwaajünajatüin wanee ayaakuaa nuulia». Nuchuntuin wamüin Maleiwa niainjachin neʼe waʼwaajüin nümüiwaʼa. Otta müsia woʼuraajapa nümüin Maleiwa waʼwaajüin nia sükajee tia (Isaías 48:11).

 Woʼuraajüle nümüin wanee nnojoikai niain Maleiwa jee niale wanee aapiee jee wanee santo, mojeerü tia nümüin. Suluʼu tü karaloʼutakat Alateetkat Mapeena (Apocalipsis), süküjain nüchiki chi aluwataaushikai Juan nuʼttuin süka nüsapain sünain aʼwaajaa wanee aapiee, nüchiaanaka Juan nutuma chi aapieekai. Anuu nünüiki: «Nnojo paaʼinrüin tia süka tayain neʼe wanee aʼyataakai wanaa pümaa nümüin Maleiwa jee namüin na puwalayuukana, na waneepiakana sünain aküjaa pütchi nüchiki Jesús. Nia neʼe Maleiwa puʼwaajüinjachika nümüiwaʼa» (Alateetkat Mapeena 19:10, BA).