¿Resadre santo ie ye kwin?
Bibliata niere
Resadre santo ie ye Biblia ñaka driere. Nikwe oradre Ngöbö aibe ie aune nuaindre Jesús käbiti. Jesukwe niebare nitre ja tötikaka kwe ie: “Munkwe blitadre krörö Ngöböbe: ‘Nun Rün nunkwe kä käinbätä, mä kä deme’” (Mateo 6:9, NGT). Nikwe oradre santo, ángel o ni mada ie ye ñan driebare Jesukwe ñakare aune Ngöbö ie driebare kwe.
Jesukwe niebare: “Ti abko ji ngöräbe, [...] ti aibe abko kukwe era erere mikaka gare Ngöböbtä amne ti aibe abko ni mikaka nire kärekäre, aisete ti ne aibe köböire ni rabadre ti Rün känti” (Juan 14:6). Jesús aibe raba nökrö Ngöbö ken blitakäre Ngöböbe ni diäre (Hebreos 7:25).
¿Ni raba orare Ngöböi aune santo ie?
Satana Jesús nuaninte ngwane, Jesukwe niebare ie: “Ni Dänkien Ngöbö aibe mikadre ütiäte jae amne niara aibe kräke sribidre” (Mateo 4:10). Ngöbö tö ja aibe mikamana täte. Aune nita orare ngwane, yebiti nita niara mike täte arato (Isaías 48:11).
Nita orare ángel o santo ie aune ñaka Ngöböi ngwane, ye tä niara mike romon. Tärä Apocalipsis yete nieta, apóstol Juan namani ngukudokwäbiti ángel iti mikakäre ngöböre jai ngwane, angelekwe ñäkäbare kore ie: “Ñan ti mika kri jai. Ti abrä sribi muko mäkwe, aune ti abrä sribi muko mä mräkätrekwe; ne abrä tä blite Jesukri gäre. Ngöbö mike kri jai mäkwe” (Apocalipsis 19:10, NGT).