Ni lo. Bible chuan Isua hmingin Pathian hnênah chauh kan ṭawngṭai tûr a ni tih a târ lang a. Isua’n a zirtîrte hnênah: “Nangni chu hetiang hian ṭawngṭai rawh u: ‘Kan Pa, vâna mi, i hming zahawm rawh se,’ ” tiin a hrilh a ni. (Matthaia 6:9) A zirtîrte chu mi thianghlim te, vântirhkoh te, a nih loh leh Pathian ni lo mi dang tuma hnêna ṭawngṭai tûrin a zirtîr ngai lo.

 Isua’n a hnungzuite chu: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” tiin a hrilh bawk. (Johana 14:6) Isua chauh hi Pathian hnêna kan tâna min dîlsak theitu awmchhun a ni.—Hebrai 7:25.

Pathian hnêna ṭawngṭai chungin mi thianghlimte hnênah pawh a ṭawngṭai theih em?

 Setana thlêmna a chhân lêtnaah Isua’n: “Lalpa i Pathian chibai bûk la, ama rawng chauh bâwl rawh,” tiin a sawi a. (Matthaia 4:10) Ṭawngṭaina hi biakna pêng pakhat a ni a. Pathian chuan ṭawngṭaina pawh tiamin, biakna thiltih eng pawh chu a hnênah chauh hlân tûrin min phût a ni.—Isaia 48:11.

 Mi thianghlimte, a nih loh leh vântirhkoh thianghlimte hial pawh ni se, mi dang tuemaw hnêna kan ṭawngṭai chuan Pathian kan tithinur ang. Tirhkoh Johana’n vântirhkoh pakhat chibai bûk a tum khân, vântirhkoh chuan: “Heti chuan ti suh khai; kei chu nangmah leh i unau, Isua hriattîrna thu pawmte bâwihpui ka ni alâwm,” tia sawiin a dang a ni.—Thu Puan 19:10.