Awe. Baibo ikalanda ukuti tulinzile ukupepa sile kuli Leza, ukupitila umwi zina lyakwe Yesu. Yesu wanenyile asambi yakwe ati: “Fwandi mwemo mwasalika vii imuti: Tata witu ulu umwi yulu; izina lyako licindikwe.” (Mateo 6:9, Icipangano Cipya) Ataatazile anenepo asambi yakwe ukupepa ku yatakatifu, ku yangeli, nanti kuli ali wensi ukucila kuli Leza.

 Nupya Yesu wanenyile asambi yakwe ati: “Nene indi nzila, cumi, nu umi. Pasi umwi angiza kuli Tata suka uwapitila muli nene.” (Yoani 14:6, Icipangano Cipya) Yesu sile ali wino Leza wapeela maka ya kutupaapatilako.—Ayebulai 7:25.

Uzye ningapepa kuli Leza nu ku yatakatifu kwene?

 Leza walanzile umu Masunde 10 ati: “Nene Mwene Leza wako ne Leza wa uzuwa.” (Kufuma 20:5, Genesis and Exodus in Mambwe-Lungu) U mu nzila ci muno Leza wayela u wa “uzuwa”? Futunoti muli Baibo wa New American Bible ikati, “akalonda ukumupepa sile wenga.” Leza akalonda ukuti apepwa sile wenga na mapepo kwene yaya sile kuli aliwe.—Ezaya 48:11.

 Tukasosya Leza nga tukupepa kuli ali wensi, nanti ku yatakatifu nanti ku yangeli amuzilo. Lino umutumwa Yoani walondanga ukupepa umungeli, umungeli wamulesizye nu kumunena ati: “Leka, utacita cico foo! Ala, nani kwene, nene muomvi muzo pamwi na anyonko aya ya kambone ya pa cumi cino Yesu wasokolola. Uwapepa sile Leza mutupu.”—Umbwilo 19:10, Icipangano Cipya.