Nee. Bibliya limbapfunzisa kuti ifepano tin’funika kumbapemba Mulungu yekha basi, mu dzina la Jezu. Ndipo Jezu adauza anyakupfunza wace kuti: ‘Mbapembani tenepa: Baba wathu kudzuluko, dzina lanu licenesedwe.’ (Mateu 6:9) Jezu alibe kupfunzisa kuti anyakupfunza wace ambapembe anyakucena, wanjo ayai cinthu cinango, koma Mulungu yekha.

Jezu adauzambo anyakupfunza wace kuti: ‘Inepano ndine njira, cadidi na moyo. Palibe omwe angafike kuna Baba, acisaya kupita na mwa inepano.’ (Juwau 14:6) Jezu yekha basi ndiye adabvumizidwa kuti ambatiyimirire pa maso pa Mulungu.—Wahebereu 7:25.

Tsono tani penu inepano ndin’pemba Mulungu na anyakucenawo?

Pa Bzakutonga Khumi bza Mulungu, cibodzi cikhati: ‘Inepano Yahova, Mulungu wako, ndine Mulungu omwe ndimbafuna kuti wanthu anamate ine ndekha basi.’ Tenepo, Mulungu ambafuna kuti wanthu anamate ayai apembe iye yekha basi.—Zaiya 48:11.

Mulungu ambaipidwa wanthu akambapemba bzinthu bzinango, kuphatanidza kupemba wanjo ayai anyakucena. Pomwe mpostolo Juwau adayezera kunamata anjo m’bodzi, anjoyo adamuletsa, acimuuza kuti: ‘Samala! Leka kucita bzimwebzi! Ndinembo kapolo ninga iwepo na abale wako omwe wana basa lakucitira umboni bwa Jezu. Namata Mulungu.’—Cibvumbulutso 19:10.