Ja Biblia mini sjeʼa tʼilan oj katikyi orasyon ja kʼulubʼal dyosiki. Tʼilan kechan yajelyi orasyon ja Dyos sok skʼulajel bʼa sbʼiʼil ja Jesús. Ja Jesús yala yabʼ ja snebʼumaniki. «Ja weʼnlexi tʼilan jach oja wawexyi orasyon: ‹JTatikon teya bʼa satkʼinal, aʼaxuk sakbʼuk jawa bʼiʼili» (Mateo 6:9). Ja Jesús nunka xchiktes ke oj katikyi orasyon jun kʼulubʼal dyos, jun anjel ma pilan bʼa mi jaʼuk ja Dyos.

 Ja Jesukristo cha xcholo: «Keʼnon ja bʼeji, ja smeranili sok ja sakʼanili. Mini maʼ xbʼobʼ kʼotuk soka Tatal ta mi jaʼuk yuja keʼni» (Juan 14:6). Ja único maʼ yiʼoj ja cholal wa xbʼobʼ kʼumanuk yuj keʼntik soka Dyos, jaʼa Jesús (Hebreos 7:25).

¿Wan maʼ xbʼobʼ axukyi orasyon ja Dyos, sok jachuk ja kʼulubʼal dyosiki?

 June ja bʼa Lajune mandariki, ja Dyos xchiktes: «Ja keʼn, ja Jyoba wa Dyosi, juni Dyos bʼa kechanta yeʼn wa skʼana ja toyjelali» (Éxodo 20:5). ¿Jas wa xkʼan yal ja «kechanta yeʼn wa skʼana ja toyjelal» ja Dyos? Jun nota ja bʼa Biblia bʼa América wa xcholo jachuk ja bersikulo it: «Yeʼnani oj kʼotuk ja único Dyos, mini jun kʼulubʼal dyos oj stukbʼes [...] ja kechanta yeʼn wa skʼana ja toyjelali». Ja Dyos wa skʼana kechanta yeʼn atoyjuk, sok ja yajelyi orasyon tini chʼikan ja bʼa toyjelal wa xkatikyi (Isaías 48:11).

 Ta ay maʼ wa xkatikyi orasyon ke mi jaʼuk ja Dyos, ama jun anjel ma jun kʼulubʼal dyos, ja yeʼn ojni yajbʼesjuk. Ja libro bʼa Apocalipsis wa xyala ke yajni ja jekabʼanum Juan koʼ mekʼan bʼa stiʼ sat jun angel bʼa yajelyi stoyjel, ja yeʼn yala yabʼ: «¡Mok jachʼ akʼuluk! Ja keʼn kechanta jun mosoʼon jastal weʼna sok jastal jawa wermano jumasaʼ, bʼa aya wiʼojex ja cholal bʼa xchiktesel sbʼaja Jesús. ¡Jaʼ xa toyo ja Dyosi!» (Apocalipsis 19:10).