Heeheʼ. Li Jesús kixkʼut naq ebʼ li xtzolom naru nekeʼxsikʼ ebʼ laj bʼanonel naq kixye: «Inkʼaʼ nekeʼraj aj bʼanonel li kawebʼ, aʼebʼ bʼan li yaj nekeʼajok re» (Mateo 9:12, Li Santil Hu, Sociedad Bíblica de Guatemala, SBG). Usta li Santil Hu maawaʼ xhuhil li kawilal, li naʼlebʼ li wank chisaʼ natenqʼank rehebʼ li nekeʼraj xbʼaanunkil li rajom li Yos.

Ebʼ li patzʼom li nokooxkʼe chi kʼoxlak

 1. Ma nintaw ru kʼaru li naʼlebʼ teʼroksi re inbʼanbʼal? Li Santil Hu naxye naq tento xtzʼilbʼal rix chiʼus junaq li naʼlebʼ chiru naq tqapaabʼ «chixjunil li nayeheʼk» qe (Proverbios 14:15, SBG).

 2. Ma us naq tinnaw kʼaru nekeʼxkʼoxla jalanebʼ chik laj bʼanonel? Xnawbʼal li nekeʼxye «naabʼalebʼ aj kʼehol naʼlebʼ» naru nokooxtenqʼa, ut jwal us wiʼ chik, wi nim ru qayajel (Proverbios 15:22, SBG).

 3. Ma naxqʼet li xchaqʼrabʼ li Yos chirix li kikʼ li bʼaneʼk li yookebʼ xyeechiʼinkil we? (Hechos 15:20).

 4. Ma teʼroksi li qʼehink, li tuulak malaj li xnaʼlebʼ li maaʼus aj musiqʼej naq tineʼril malaj naq tineʼxbʼan? Li Santil Hu inkʼaʼ naxkʼulubʼa li «tuulak» (Gálatas 5:19-21). Re naq maakʼaʼaq bʼayaq qakʼaʼuxl chirix aʼin, naru naqakʼoxla rix wiibʼ oxibʼ li patzʼom:

•   Ma naroksi li qʼehink malaj junaq li naʼlebʼ chirixebʼ li maaʼus aj musiqʼej li naxyeechiʼi qabʼanbʼal?

•   Ma naxpaabʼ naq li yajel kʼebʼil xbʼaan junaq li yos malaj yal kʼebʼil?

•   Ma naroksi li yatzʼbʼil xul, li mayej, li qʼol, li anum, li qʼehink malaj li tuulak re xyiibʼankil malaj re roksinkil li bʼan?

 5. Ma yalaq kʼaru ninbʼaanu re xtawbʼal inkawilal? Li Santil Hu naxye: «Cheʼxnaw chixjunilebʼ naq nekexnaʼlebʼak chiʼus» (Filipenses 4:5, La Biblia. Traducción del Nuevo Mundo, TNM, 2019 saʼ español). Li naʼlebʼak chiʼus tooxtenqʼa chi xkʼebʼal reetal kʼaru «wank tzʼaqal xwankil», saʼ xyanq aʼin wank li kʼanjelak chiru li Yos (Filipenses 1:10, TNM, 2019; Mateo 5:3).