Imbo. Ibiris ima isya kaku. Refo doḇe ”supswan ḇesiper ine isya ro papoik Ibirisya”, malaikat ḇeḇarḇor kaku ma ḇyembroḇ Allah I. (Yohanes 14:30; Efesus 6:11, 12) Refo ya fyasnaibos kaku manseiso Ibiris i roro snonsnon ma apap ḇekurfasnai ḇe i nane:

•   Setan, knam ya iso ”Ḇesampum”.​—Ayub 1:6.

•   Ibiris, knam ya iso ’Ḇeanonef’.​—Wahyu 12:9.

•   Ikak, ḇeḇeyap ro Refo kyur ḇe ’Ḇeanggar’.​—2 Korintus 11:3.

•   Ḇefararwrowes.​—Matius 4:3.

•   Ḇyeanggarkar.​—Yohanes 8:44.

Ima rari ḇaido kenem ḇeḇye ḇa monda ḇa

 Ono ḇekara Ibiris ima rari ma kenem ḇeḇye ḇa ḇero ḇaken koḇena monda. Imbape, Refo fyasepen awawos rofandu Manseren ma Ibiris su. Manseren Allah ima inapes, inja na kopok kokara isya dawos kuker bar ḇeḇarḇor ono ro I. (Ulangan 32:4; Ayub 2:1-6) Ibiris i kako ifrowes Yesus i, ḇeyakfrur sasar ḇa ani. (Matius 4:8-10; 1 Yohanes 3:5) Inja bisa kokofen, Refo fyasnaiḇair snar Ibiris ima isya kaku, mboi rari ḇaido kenem ḇeḇye ḇa isyaḇa.

 Na kokandor kukro snonggaku ḇebor sya sikyar ḇa Ibiris ima isya kaku ke? Oroḇaḇeri, kukro Refo ikofenḇair snar Ibiris ifrowes snonggaku ḇebor sya insama ismai roi imarisen na. (2 Tesalonika 2:9, 10) Anggarkar ḇeḇye ḇa kaku ḇyena iso irup snonggaku sya insama sikyar ima isyaḇa.​—2 Korintus 4:4.

  Roi ḇekaku ḇa: Lusifer ima snonsnon ḇese ro Ibiris i.

 Roi ḇekaku: Refo ḇeḇeso sefararwei wos Ibrani ”Lusifer” ḇe ”ḇebuk sananai”. (Yesaya 14:12) Wos ine kyurfasnai apap ine kyur ḇe dinasti, ḇaido raja ḇeḇeso, ro Babilon, Manseren Allah ifrur mamyai ansi snar ararer sena. (Yesaya 14:4, 13-20) Apap ”ḇebuk sananai” sbuk na fa skoryae dinasti Babilon fafisu sisapi ya.

  Roi ḇekaku ḇa: Manseren Allah ḇye Ibiris i fa ifrowes snonggaku sya.

 Roi ḇekaku: Ibiris ima Manseren Allah mbroḇ Ḇyedirya, inja Manseren Allah na dor fafnoḇek ro i ḇa. Ibiris pyampum ma danggar snonggaku ḇemarisen ḇefarmyan ḇe Manseren Allah.​—1 Petrus 5:8; Wahyu 12:10.