Io, e tiko dina na Tevoro. Qo na kabula vakayalo e vakavuna ga me yalo ca qai talaidredre vua na Kalou, e “turaga ni vuravura qo.” (Joni 14:30; Efeso 6:11, 12) E vakamacalataka na iVolatabu na itovo ni Tevoro ena vica na yaca qo kei na kedra ibalebale:

•   Setani, e kena ibalebale “Dauveivorati.”—Jope 1:6.

•   Tevoro, e kena ibalebale “Dauvakaucaca.”—Vakatakila 12:9.

•   Gata, e cavuti ena iVolatabu me kena ibalebale “Dauveivakacalai.”—2 Korinica 11:3.

•   Dauveitemaki.—Maciu 4:3.

•   Daulasulasu.—Joni 8:44.

Sega ni ca ga e tiko e lomada

 Era nanuma eso ni o Setani na Tevoro na ca ga e tiko e lomada. Ia e volatukutukutaki ena iVolatabu ni rau a veivosaki tiko na Kalou kei Setani. Ni uasivi na Kalou, ena sega ni vakaibalebale me vosa tiko ga ena dua na ka ca e lomana. (Vakarua 32:4; Jope 2:1-6) O Setani a temaki Jisu tale ga, o koya e sega ni valavala ca. (Maciu 4:8-10; 1 Joni 3:5) Koya gona, e vakaraitaka na iVolatabu ni tiko dina na Tevoro, e vu ni ca kece ga.

 Vakacava, meda kurabuitaka nira sega ni vakabauta e levu ni tiko dina na Tevoro? Sega. E kaya na iVolatabu ni veivakacalai tiko o Setani me rawa kina nona inaki. (2 Cesalonaika 2:9, 10) Dua nona ivadi qaseqase oya me vakamatabokotaka na lomadra na lewenivanua mera kua ni kila ni bula dina.—2 Korinica 4:4.

  Ka e nanumi: O Lusefa e dua tale na yaca e kilai kina na Tevoro.

 Kena dina: Na vosa vakaIperiu e vakadewataki me “Lusefa” ena so na iVolatabu e kena ibalebale na ‘kalokalo ramase.’ (Aisea 14:12) E matata mai na tikina wavolita ni vosa qo e dusia na vuvale vakatui se iyatukawa vakatui mai Papiloni, ena qai vakalolovirataka na Kalou ena vuku ni nodra viavialevu. (Aisea 14:4, 13-20) E vakayagataki na matavosa ‘kalokalo ramase’ me vakalialiai kina na vuvale vakatui mai Papiloni ni sa vakamalumalumutaki.

  Ka e nanumi: Na Kalou e lesi Setani me “dauveibeitaki.”

 Kena dina: Na Tevoro e meca ni Kalou, e sega ni nona dauveiqaravi. O Setani na Tevoro e dau saqati ira qai beitaki ira na qarava na Kalou.​—1 Pita 5:8; Vakatakila 12:10.