Yaa, te Taywel is een spirituaal kriatuer woo xlecht kewoer is un hot sich keeche Kot kextelt. Ti Piipel nënt tee wii “kheenich fon te welt”. (Yoohan 14:30; Ëfeser 6:11, 12) Ti Piipel kep tëm Taywel phaar thitele woo tsayche was fer sort persoon tee is.

•   Satanaas, woo petayt “Keechenter”. (Yoop 1:6)

•   Taywel, woo petayt eene woo liieray iwich anere uf pringt. (Apokalipsis 12:9)

•   Xlang, woo in te Piipel petayt eene woo anere hinerkeet. (2 Korinter 11:3)

•   Eene woo anere fersuucht. (Matheus 4:3)

•   Liichner. (Yoohan 8:44)

Tas is net ti xlechtichkheet im mënx

 Fiile tenke tas Satanaas, te Taywel, is ploos ti xlechtichkheet woo in yeete eene is. Ti Piipel tsaycht een kexpreech unich Kot un te Taywel. Kot is perfekt, un tee hot sicher niks xlechtes in sich selepst. (Teuteronoomyum 32:4; Yoop 2:1-6) Un soo waar tas aach wii te Taywel Yeesus fersuucht hot. Tee hat niks xlechtes in sich. (Matheus 4:8-10; 1 Yoohan 3:5) Soo, tsaycht ti Piipel tas te Taywel wërklich een persoon is, un net ti xlechtichkheet woo im mënx is.

 Meechte mer uns wunere mise tas fiile net klaape tas es een Taywel kept? Uf khee aat, wayl ti Piipel tsaycht tas te Taywel unerxiitliche aate penutst fer sayn opjetiiwe erfiile. (2 Thesalooniker 2:9, 10) Mit kroos xlauheet, macht tee tas ti layt net klaape tas tee wërklich eksistiirt. (2 Korinter 4:4)

  Was ti layt mëne: Lusifer is te anere naame fom Taywel.

 Was ti Piipel saat: Tas hepreeyxe wort woo in te Piipel iwersetst is “Lusifer” petayt “klensich”. (Isaiias 14:12) Im kapitel 14 fon Isaiias, hot tas wort tsu tuun mit te kheenich apxtamung fon Papiloon, woo waar soo arokant tas Kot teet se ferxeeme. (Isaiias 14:4, 13-20) Te thitel “klensich” is penutst woer fer ti kheenich apxtamung fon Papiloon ferxpote, noo iire fernichtung.

  Was ti layt mëne: Satanaas xaft fer Kot, wii een “atwokaat woo keeche xprecht”.

 Was ti Piipel saat: Te Taywel is Kot sayne faynt, un net sayne knecht. Satanaas, te Taywel, xtelt sich keeche un kept falx aan tii woo Kot tiine. (1 Pheeter 5:8; Apokalipsis 12:10)