Heeheʼ, wank laj Tza, aʼan jun li musiqʼej li kimaaʼusoʼk xnaʼlebʼ ut kixqʼet ribʼ chiru li Yos. Aʼan «laj Taqlanel saʼ xbʼeen li ruuchichʼochʼ» (Juan 14:30, Li Santil Hu, Sociedad Bíblica de Guatemala; Efesios 6:11, 12). Li Santil Hu naroksi wiibʼ oxibʼ li kʼabʼaʼej re xkʼutbʼesinkil chanru xnaʼlebʼ li musiqʼej aʼin. Kʼe reetal:

•   Tza naraj xyeebʼal «aj qʼetol aatin» (Job 1:6).

•   Diʼaabʼl naraj xyeebʼal «aj yoobʼanel aatin» (Apocalipsis 12:9).

•   Kʼantiʼ, li Santil Hu naroksi li kʼabʼaʼej aʼin re xyeebʼal aj bʼalaqʼ (2 Corintios 11:3).

•   Aj aaleenel (Mateo 4:3).

•   Aj tikʼtiʼ (Juan 8:44).

Maawaʼ reetalil li inkʼaʼ us chi moko li maaʼusilal li wank rikʼin chixjunilebʼ

 Wankebʼ nekeʼxye naq laj Tza aʼan reetalil li inkʼaʼ us malaj li maaʼusilal li wank rikʼin chixjunilebʼ, joʼ ajwiʼ rikʼin li Yos. Saʼ li Santil Hu wank resil naq saʼ jun kutan li Yos ut laj Tza keʼseeraqʼik. Abʼan, li Yos tzʼaqal re ru ut saq ru li xyuʼam. Joʼkan naq, chanru tooruuq xyeebʼal naq wank maaʼusilal saʼ xchʼool li Yos? (Deuteronomio 32:4; Job 2:1-6). Ut kʼaru tooruuq xyeebʼal chirix laj Tza naq kiraale li Jesús, li maakʼaʼ xmaak? (Mateo 4:8-10; 1 Juan 3:5). Li Santil Hu naxkʼut chi chʼolchʼo ru naq wank laj Tza ut maawaʼ yal reetalil li maaʼusilal.

 Naabʼalebʼ li qas qiitzʼin nekeʼxye naq moko wank ta laj Tza. Ma nasach qachʼool rabʼinkil aʼin? Maajoqʼe bʼiʼan, li Santil Hu naxye naq laj Tza naroksi yalaq kʼaru chi tikʼtiʼ re xtawbʼal li naraj (2 Tesalonicenses 2:9, 10). Ut jun rehebʼ li tikʼtiʼ li naʼelk chiʼus chiru laj Tza aʼan naq ebʼ li poyanam nekeʼxkʼoxla naq moko wank ta chi kutankil (2 Corintios 4:4).

Tikʼtiʼ: Lucifer aʼan jun chik li kʼabʼaʼej li nayeemank re laj Tza.

 Yaal: Li aatin saʼ hebreo «Lucifer» li natawmank saʼ wiibʼ oxibʼ li Santil Hu naraj xyeebʼal «nalemtzʼunk» (Isaías 14:12, Li Santil Hu, Wycliffe Bible Translators. Akʼ tzʼiibʼ). Li aatin aʼin natawmank saʼ jun li propesiiy, ut wiibʼ oxibʼ chik li raqal li Santil Hu naxkʼut naq yook chi aatinak chirix li xʼawabʼejilal li tenamit Babilonia li tkubʼsiiq xwankil xbʼaan li Yos saʼ xkʼabʼaʼ li xqʼetqʼetil (Isaías 14:4, 13-20). Saʼ li propesiiy aʼin, naq ebʼ li awabʼej nekeʼisiik saʼebʼ li xwankil, ebʼ li junchʼol nekeʼxkʼabʼaʼi «nalemtzʼunk» yal re xseʼenkilebʼ.

Tikʼtiʼ: Laj Tza wank choʼq xmoos li Yos.

 Yaal: Laj Tza xikʼ naril li Yos ut moko wank ta choʼq xmoos. Laj Tza xikʼ ajwiʼ narilebʼ li xmoos li Yos joʼkan naq naxrahobʼtesihebʼ ut naxqʼabʼahebʼ chi maakʼaʼ xyaalal (1 Pedro 5:8; Apocalipsis 12:10).