En-en, Dyabola udi’ko bine. I “mulopwe wa ino ntanda,” mwikeulu wāikele ke mubi, wātombokela Leza. (Yoano 14:30; Bene Efisesa 6:11, 12) Bible ulombola ngikadila ya Dyabola ne mwine mwaikadile kupityila ku majina andi:

•   Satana, ko kunena’mba “Kinkwa.”—Yoba 1:6.

•   Dyabola, ko kunena’mba “Vubavuba.”—Kusokwelwa 12:9.

•   Nyoka, dingidijibwe mu Bible mwanda wa kufunkila pa “Ñongojani.”—2 Bene Kodinda 11:3.

•   Wakumutompa.—Mateo 4:3, Mukanda Ukola.

•   Mbepai.—Yoano 8:44.

Ke musoñanyapo nansha ngikadila mibi

 Bantu bamo bamwene Satana Dyabola bu musoñanya nansha ngikadila’tu mibi idi munda mwetu. Inoko, mu Bible i balombole’mo Leza wisamba na Satana. Leza i mubwaninine, o mwanda kabwanya kwisamba na kintu kibi kidi mwadi. (Kupituluka mu Bijila 32:4; Yoba 2:1-6) Ne kadi, Satana wātompele Yesu, mwine kādipo na bubi. (Mateo 4:8-10; 1 Yoano 3:5) Nanshi Bible ulombola’mba Dyabola udi’ko bine, ke bubipo’tu budi mu muntu.

 Le kukulupila kukulupile bantu bavule amba Dyabola kadi’kopo kufwaninwe kwitutulumuja? Nansha dimo, mwanda Bible unena’mba Satana ongolanga bantu mwanda wa kufikidija mpango yandi. (2 Bene Tesalonika 2:9, 10) Manwa makatampe aingidija i a kusaba meso a bantu bavule bakomenwa kuyuka’mba udi’ko.—2 Bene Kodinda 4:4.

  Lufumo: Lushifelo i dijina dikwabo dya Dyabola.

 Bubine: Kishima kya Kihebelu kyalamwinwe mu Mabible amo bu “Lushifelo” kishintulula’mba “weñenya.” (Isaya 14:12) Myanda idi kūlu ne kunshi ilombola’mba kino kishima kifunkila pa kisaka, nansha musuku wa balopwe ba Babiloni, wādi wa kufwijibwa bumvu na Leza pa mwanda wa kibengo. (Isaya 14:4, 13-20) Kishima “weñenya” kyāingidijibwe mwanda wa kisaka kya bwine Babiloni pa kupwa kubikulwa.

  Lufumo: Satana wingidilanga Leza bu “zuji.”

 Bubine: Dyabola i walwana na Leza, ke mwingidi wandipo. Satana Dyabola ulwanga na Bantu bengidila Leza ne kwibabepela bya bubela.—1 Petelo 5:8; Kusokwelwa 12:10.