Eelo, Diabolo ekɔ onto la mɛtɛ. Nde ekɔ “owandji w’andja ɔnɛ,” etongami ka lo nyuma kakayokoma kanga kɔlɔ ndo kakatɔmbɔkwɛ Nzambi. (Jni. 14:30; Ɛf. 6:11, 12) Bible tosholɛka lonto laki Diabolo oma lo nkombo yawoshatɔ:

•   Satana, kitshimudi ate “Ɔndɔshi.”​—Jɔbɔ 1:6.

•   Diabolo, kitshimudi ate “Omamanyishi.”​—Ɛnyɛlɔ 12:9.

•   Olui, wokambi lawɔ lo Bible nembetshiyaka “Okesanyi.”​—2 Kɔrɛtɔ 11:3.

•   Ohembanyi.​—Mateo 4:3.

•   Kanga kashi.​—Joani 8:44.

Nde keema kɔlɔ kele l’otema w’onto

 Le anto amɔtshi, Satana Diabolo ekɔ kɔlɔ kele l’otema w’onto. Koko lo Bible, sho tanaka sawo dia lam’asa Nzambi nde la Satana. Lam’ele Nzambi ekɔ kokele, nde hakoke ntɛkɛta l’ɛngɔ ka kɔlɔ. (Eohwelo k’Ɛlɛmbɛ 32:4; Jɔbɔ 2:1-6) Ndo nto, Satana akahembe Yeso. Ndo sho mbeyaka dia Yeso “bu la pɛkato.” (Mateo 4:8-10; 1 Joani 3:5) Bible mɛnyaka dia Diabolo ekɔ onto la mɛtɛ ndo nde bu didjidji dia kɛnɛ kele kɔlɔ.

 Anto efula hawetawɔ dia Satana ekɔ onto la mɛtɛ. Onde dui sɔ pombaka tambiya? Ndooko, nɛ dia Bible mbutaka dia Satana ekɔ lo nkesa anto dia nkotsha eyango ande. (2 Tɛsalɔnika 2:9, 10) Lokeso laleka nkamba la nde ele ‘mbetɛ anto efula otshungu’ lo mbaetawoya dia nde bu. (2 Kɔrɛtɔ 4:4).

Kashi: Lucifer ekɔ lokombo lokina laki Diabolo.

 Mɛtɛ: Lo Bible mɔtshi, tshɛkɛta Lucifer tanemaka lo Isaya 14:12. Tshɛkɛta ya lo Hɛbɛru yɔtɔnganɛ la yɔ nembetshiyaka “ɛngɔ kangayima.” Awui wotingi divɛsa sɔ mɛnyaka dia tshɛkɛta shɔ mendanaka la nkumi ya dikanga ya la Babilɔna yakayahɔnaka ndo yeke Nzambi akayisha sɔnyi nɛ dia yɔ yaki etako. (Isaya 14:4, 13-20) Tshɛkɛta “ɛngɔ kangayima” vɔ nkamba la yɔ lo yoho ya lɔsɔkɔ dia nembetshiya dioho dia nkumekanga y’ase Babilɔna l’ɔkɔngɔ w’ɔkwɛlɔ ayɔ.

Kashi: Satana ekɔ lo kambɛ Nzambi olimu oko “prɔkirɛrɛ.”

 Mɛtɛ: Diabolo ekɔ otunyi waki Nzambi, koko aha okambi ande. Satana Diabolo ndɔshaka wanɛ wakambɛ Nzambi ndo nde mbasɔngwɛka awui wa kashi (1 Petero 5:8; Ɛnyɛlɔ 12:10).