Mediro e megolo ya go aga ya Dihlatse tša Jehofa kua United States e a kgatlampana, ka thušo ya baithaopi bao ba šomago ka thata ba nageng yeo.

Wallkill, New York: Lefelo le ke moo go dulago Dihlatse tše di fetago tše 1 600 le moo go hlangwago dikgatišo tša Dihlatse tša Jehofa kua United States. Baagi bao bontši bja bona e lego baithaopi ba katološa meago ya kua Wallkill ka go aga diofisi tša mabato a mararo, lefelo la go phaka dikoloi le meago ya bodulo ya mabato a mararo moo go tlago go dula bašomi ba moo. Ka 2012, baithaopi ba be ba šetše ba agile lefelo la go boloka ditlabakelo tša elektroniki le dikhomphutha le go katološa phapoši ya go jela gore go tle go dule batho ba bangwe ba 200.

Dinageng tše dintši, Dihlatse tša Jehofa di na le mafelo a taolo ao a bitšwago diofisi tša makala, go akaretša Brazil, Jeremane le Mexico. Kua United States, meago ya Dihlatse tša Jehofa e akaretša lefelo la thuto kua Patterson, New York le diofisi kua Brooklyn, New York. Ge meago ye e fetšwa go katološwa, Wallkill e tla ba moago o mogolo wa Dihlatse tša Jehofa lefaseng ka bophara.

Warwick, New York: Ye e tla ba ntlokgolo e mpsha ya Dihlatse tša Jehofa. Meago yeo e bego e le moo e tlošitšwe. Dihlatse di rekile lefelo le lengwe leo le lego dikhilomithara tše 10 kua Tuxedo, New York, gore di boloke metšhene le ditlabakelo tša go aga ntlokgolo ye. Bammušo ba dumelelana le tsela yeo re tlago go diriša lefelo le ka yona ka ge se se ka se senye tikologo. Ge polane ya rena e se na go dumelelwa, re tla romela dikgopelo tša go aga. Mo nakong ye, ntlokgolo ya Dihlatse tša Jehofa e sa le kua Brooklyn, New York.