Li stestigotak Jeovae yakal tspasik chaʼtos abtelal tsots skʼoplal ta Estados Unidos ti anil chanav batele. Jaʼ koliyal li buchʼutik chkoltavanik ti tsots ch-abtejik ti likemik tal ta sjunul Estados Unidose.

Wallkill. Li mukʼta naetik yakal tspasike chtun sventa chichʼ pasel imprimir vunetik, jech xtok te nakal 1,600 stestigotak Jeova. Koliyal li buchʼutik chkoltavanik li ta Wallkille chichʼ pasel jpʼej na sventa ofisinaetik xchiʼuk jpʼej na sventa vayebal ti oxib spisoale xchiʼuk ti oy skotleb karoe. Li ta 2012 tsuts svaʼanel li na sventa li yavil abtejebaletike, jech xtok laj yichʼ mukʼibtasel li veʼebal sventa ch-och chib sien mas li buchʼutik te chveʼike.

Li stestigotak Jeovae oy Beteletik yuʼunik ta epal lumetik, jech kʼuchaʼal ta Alemania, Brasil xchiʼuk México. Li ta Estados Unidos, Nueva Yorke, oy s-ofisinaik ta Brooklyn xchiʼuk oy yuʼunik smeʼ chanubtasel ta Patterson. Mi tsuts li Betel ta Wallkille jaʼ xa mas mukʼ chkʼot ta skotol li Beteletik ta spʼejel Balumile.

Warwick. Te chichʼ vaʼanel li achʼ smeʼ nail abtelal yuʼun stestigotak Jeovae. Laj xa yichʼ jinesel li naetik te toʼoxe. Jech xtok laj yichʼ manel jsep osil li ta Tuxedoe, ti te van 10 kilometrouk snamale, sventa skʼejobil makinaetik xchiʼuk li yantik kʼusitik chtune. Snaʼojik xa li ajvaliletik ta sventa li kʼusitik xuʼ chkʼot ta pasel sventa osilbalumil ta skoj taje. Mi tsuts spasel li splanoal ti bu chichʼ pasele, xuʼ xa xichʼ kʼanel permiso sventa chichʼ vaʼanel. Pe li avie te to oy ta Brooklyn li smeʼ nail abtelale.