Atu anji kakulihula hakutwala ku ulemu wa mwono mu milali yinji, ngwe chakutalilaho: Mumu liaka tuli hano? Shina mwono wami ukwete ulemu? Mbimbiliya yakusolola ngwo, ulemu wa mwono chili kupwa ni usepa ni Zambi. Tala umwenemwene umwe uze akusolola mu Mbimbiliya:

•   Zambi iye Sakatanga wetu. Mbimbiliya yakwamba ngwo: “Yehova iye Zambi, iye watutangile, tuli ninyenyi.”—Samu 100:3; Usolwelo 4:11.

•   Kuli chitela chize Zambi atangililile yuma yeswe, chino chinatale nawa hali yetu atu.—Izaia 45:18.

•   Zambi katutangile ni uswale mu “mu spiritu,” chino chinatele nawa ha usona wa kuzanga kunyingika ulemu wa mwono. (Mateu 5:3) Iye kanazange hanga tuhwise usona wacho.—Samu 145:16.

•   Twakuhwisa uswale wetu wa ku spiritu, ha kupwa masepa ja Zambi. Chipwe ngwe kupwa sepa lia Zambi chakusoloka ngwe chuma chize kuchichi kuhasa kulingiwa, hindu Mbimbiliya yakutukolweza ngwo: “Kundamenu kuli Zambi, mba iye kumakakundama kuli yenu.”—Tiangu 4:8; 2:23.

•   Nyi tunazange kupwa masepa ja Zambi, twatamba kutwama kulita ni upale wenyi hali yetu. Mbimbiliya yinasolola upale wacho ha mukanda wa Chilumbununyi 12:13, unambe ngwo: “Vwila woma Zambi, ni kufunga shimbi jenyi, mumu henaho hasulila milimo ya mutu.”

•   Kulutwe lia matangwa, mutukamona umanunuko wa upale wa Zambi hali yetu, muze makahwisa lamba ni kuhana mwono wa mutolo kuli masepa jenyi, waze akumuwayila.—Samu 37:10, 11