En vez de prohibi tiene alegria na sexo, el Biblia ta dale mira que un regalo se estaba con Dios para na maga casao. Ya crea le con el maga gente “hombre y mujer” y ya mira le con el cosa le ya hace como “bien bonito.” (Genesis 1:27, 31) Cuando ya dale le casa con el primer hombre y mujer, ya habla le que sila “queda un laman.” (Genesis 2:24) Incluido na este union amo el alegria na sexo y tiene cerca emocion.

 Ya dale mira na Biblia el alegria que ta sinti el maga marido na matrimonio na este maga palabra: “Queda alegre junto na de tuyu mujer que ya casa tu cuando joven tu . . . Satisfecha era tu pirmi na de suyu pecho. Ojala pirmi tu queda alegre na de suyu amor.” (Proverbio 5:18, 19) Quierre tambien el Dios que queda alegre el maga mujer na sexo. El Biblia ta habla: “El marido necesita dale con el mujer el derecho disuyu como mujer. Y ansina tamen el mujer con el marido.”—1 Corinto 7:3, El Nuevo Testamento na Chavacano.

Limitacion na sexual alegria

 Ta permiti el Dios con el sexual relacion entre lang na man maridable como cosa ta dale mira na Maga Hebreo 13:4: “Tene ustedes todo grande respeto con el matrimonio y no mancha con pecado el cama del maga maridable, cay el Dios ay castiga con aquellos quien ta man cabit y ta comete adulterio.” El man maridable debe esta fiel na uno’y otro. Ta queda sila bien alegre cay nuay sila satisfecha el diila lang mismo cuerpo sino ya aplica sila con el principio na Biblia: “Mas grande el alegria de aquel quien ta dale contra con el quien ta recivi.”—Maga Actividad 20:35.