Mohesi na bandumi ababibi, bikubasyoba fiyo abandu. Yonongwa yake Ibaibolo likuti: “Ikisu kyosa kili mmaboko gha Mbibi.” (1 Yohani 5:​19) Ibaibolo likuyoba injila isi Mohesi ikubombela pakubasyoba abandu.

•   Ubusyobi. Ibaibolo likubakasya Abakristu ukuti ‘babupingeghe ubukomu bwa Mohesi.’ (Baefesi 6:​11) Ubukomu (ubuyanja) bumo ubu ikubombela ko kubasyoba abandu ukuti basubileghe ukuti ababombi bake, bo babombi ba Kyala.​—2 Bakorinti 11:13-​15.

•   Ukusubila imbepo inyali. Mohesi ikubasyoba abandu ukwendela mbaghanga, abasololi babutungulu na bandu aba bikubomba isya manjele. (Ukukumbusya Indaghilo 18:10-​12) Abandumi ababibi bighanile kangi ukubatamya abandu aba bikubombela imikota iyi yikukolelana ni mbepo inyali, imikota iminyali iyi yikughonesya utulo mu manjele ni ifingi.​—Luka 11:24-​26.

•   Ikipanga kya butungulu. Ifipanga ifi fikumanyisya ifindu ifya butungulu, fikubasofania abandu ukuti baleke ukumpilikila Kyala. (1 Bakorinti 10:20) Ibaibolo likufikolela ifimanyisyo ifya butungulu ifi ukuti ‘fimanyisyo fya mbepo inyali.’​—1 Timoti 4:1.

•   Ukukoliwa ni mbepo inyali. Ibaibolo lili ni nkhani sya bandu aba bakoliwe ni mbepo inyali. Bamo syabapangisyagha ukuya bafwamaso, basitakuyoba na bangi syabapangisyagha ukuti bifulasyeghe bene.​—Matai 12:22; Marko 5:​2-5.

Ngimba mubaghile ukubomba isyafiki ukuti Mohesi aleke ukubasyoba

 Mutikulondiwa ukubatila abandumi ababibi panongwa yakuti mu Baibolo muli ifundo isi mubaghile ukubombela ukuti muntole Mohesi:

•   Mukulondiwa ukusyaghania injila sya Mohesi ‘namanga musimenye itolo inyinong’ono syake.’​—2 Bakorinti 2:​11.

•   Mumanyileghe Ibaibolo nukukonga ifi mukumanyila. Ifi fibaghile ukubatula ukuti Mohesi aleke ukubasyoba.​—Baefesi 6:​11-​18.

•   Mukulondiwa ukutagha kilikyosa iki kikukolelana ni mbepo inyali. (Imbombo sya Batumiwa 19:19) Ifi fikongelelapo inyimbo, amabuku, amagazini, ifithuzi na mafilimu agha ghikunangisya ifya mbepo inyali.