Nanga, Abahamirizi ba Yehova hirhaba hidîni kone. Rhuba Bakristu rhunanajire okwirhu koshi lyo rhukulikira olwiganyo lwa Yezu n’enyigirizo za Yezu Kristu.

 Oluderho “hidîni kone” kuli kuderha ebintu biri lubero n’ebihaba. Rhuganirire ntanya ibirhi zimanyikine bwenene okubiyerekire orhudîni kone, lyo rhubona bulya gurhi ebyo birhayerekiri Abahamirizi ba Yehova.

•   Kuli bantu baguma baguma, ehidîni kone, hiri hidîni hihyahya n’ehihagalika amakanuni gayorha gahaba. Abahamirizi ba Yehova barhatungaga idîni lyabo. Lubero n’oko, enterekêro yirhu enajirwe nk’oku Abakristu bw’omu myaka igana mirhanzi banakagijira; enyiganyo zabo n’olugenzi lwabo biba biganirirwe omu Bibliya. (2 Timoteyo 3:16, 17) Rhuba rhuyemire oku okubiyerekire idîni, amandiko matagatifu go gakwanine garhôle enafasi ntanzi omu nterekêro rhuhâ Nnâmahanga.

•   Bantu baguma baguma banakarhanya oku ehidîni kone ciba câma c’idîni ly’okuhagalika oburhegesi bw’abantu n’oku cirongozi waco aba muntu. Nta muntu yeshi-yeshi Abahamirizi ba Yehova babona oku ye cirongozi wabo. Rhunarhumikire aka kanuni ka Yezu: “Nnâhamwinyu ali muguma, ye Kristu.”​—Mateyo 23:10.

 Lubero n’okuba idîni ly’okuhagalika oburhegesi bw’abantu, Abahamirizi ba Yehova liba idîni linja oku ngasi yeshi omuja n’oku lubaga loshi. Kwa lwiganyo, omukolo gwirhu gw’okuhubiri gunarhabale abantu bayâke enkomêdu mbi, nk’okulaluka n’okunywa ecimoge. Rhunayigirize abantu barhasomaga oku basoma n’okuyandika. Kandi, amango gw’obuhanya, rhunajire okwirhu koshi lyo rhuhâna oburhabale oku bantu bahikirwe n’obuhanya. Rhunacihangane okujirira abalungu birhu ebintu binja nk’oku Yezu anabwiraga abanafunzi bage bakajira.​—Mateyo 5:13-16.