Wɔkyerɛ Hebrew kasafua neʹphesh na Greek kasafua psy·kheʹ ase “ɔkra” wɔ Bible no mu. Sɛ wɔkyerɛ Hebrew kasafua yi ase tsenn a dza ɔkyerɛ nye “abɔdze a otum gye ahom,” na Greek mu so dza ɔkyerɛ nye “nyimpa.” a Dɛm ntsi, ɔkra no yɛ nyimpadua no nyina, na nnyɛ biribi a ɔhyɛ nyimpadua no mu a ɔkɔ do tsena ase wɔ nyimpa no wu ekyir. Hwɛ dza Bible no ka a ɔma yehu dɛ ɔkra no kyerɛ nyimpadua no nyina:

•   Aber a Jehovah bɔɔ nyimpa a odzi kan a ɔno nye Adam no, Bible no ka dɛ, “nyimpa bɛyɛɛ ɔkra tseasefo.” Adam ennya ɔkra na mbom ɔbɛyɛɛ ɔkra tseasefo.

•   Bible no ka dɛ ɔkra tum yɛ edwuma, odzidzi, na odzi mbra do. (Leviticus 5:2; 7:​20; 23:30; Deuteronomy 12:20; Romefo 13:1) Dɛm dwumadzi ahorow no nyina no, wɔdze nyimpadua mu no nyina na wɔdze yɛ.

Aso ɔkra no nnwu a?

 Oho, ɔkra no botum ewu. Bible kyerɛwnsɛm ahorow pii ma yehu dɛ ɔkra no botum ewu. Nhwɛdo ahorow bi nye yi:

•   “Ɔkra a ɔyɛ bɔn no, ɔnoara na obowu.”​—Ezekiel 18:​4, 20.

•   Wɔ tsetse Israel no, sɛ obi yɛ bɔn kɛse bi a nna asotwe a wɔdze bɛma no nye owu. Bible no ka dɛ ɔsɛ dɛ dɛm ‘ɔkra no wotwa no kyen.’ (Exodus 12:15, 19; 31:14; Leviticus 7:​20, 21, 27; 19:8)

•   Bible nkyerɛase ahorow bi mu no, sɛ wɔreka nyimpa a oewu ho asɛm a wɔ kyerɛwnsɛm ahorow bi mu a, asɛmfua a wɔdze dzi dwuma nye ɔkra a oewu. (Leviticus 21:11; Nkanee 6:6) Ɔwɔ mu dɛ Bible nkyerɛase ahorow bi dze “fun” anaa “nyimpa a oewu” dzi dwuma wɔ dɛm kyerɛwnsɛm no mu dze, naaso wɔ tsetse Hebrew nkyerɛwee no mu no, wɔdze nkasafua neʹphesh, anaa “ɔkra” na wɔdze dzii dwuma.

“Ɔkra” botum akyerɛ “nkwa”

 Bible no san dze “ɔkra” gyina hɔ ma “nkwa.” Dɛ nhwɛdo no, Job 33:22 dze Hebrew kasafua a ɔkyerɛ “ɔkra” (neʹphesh) san so gyina hɔ ma “nkwa.” Dɛmara so na Bible no ka dɛ nyimpa bi ne kra anaa no nkwa ayew anaa ɔdze ekitsa ne nsamu.​—Exodus 4:​19; Atsɛmbuafo 9:​17; Philippifo 2:​30.

 Mbrɛ wɔdze “ɔkra” no dzi dwuma no ma yɛtse siantsir a ɔtɔ da a kyerɛwnsɛm no ka dɛ obi “ne kra rifi no mu” no ase. (Genesis 35:18) Dɛm kasambirenyi yi kyerɛ dɛ nyimpa no nkwa reba ewiei anaa oruwu. Bible nkyerɛase bi kyerɛ asɛm a ɔwɔ Genesis 35:18 no ase dɛ “oguu n’ahom a otwa tun.”​—Good News Translation; New Jerusalem Bible.

Beebi a ɔkra a onwu da nkyerɛkyerɛ no fi bae

 Asɔrasɔr a wɔfrɛ hɔnho dɛ Christianfo a wɔgye dzi dɛ ɔkra no nnwu no nyaa dɛm nkyerɛkyerɛ yi fii Greek nyansapɛfo hɔ na nnyɛ Bible no mu bi a. Nwoma a wɔato dzin Encyclopædia Britannica ka dɛ: “Sɛ Bible no ka ɔkra ho asɛm a ɔyɛ a ɔfa ahom ho, na ɔnnkyerɛ dɛ ɔkra a enyiwa innhu bi wɔ hɔ, nna honam nyimpadua so wɔ hɔ. Ntsi Christianfo nkyerɛkyerɛ a ɔnye dɛ ɔsor ɔkra no nna ɔsor nyimpadua no fi tsetse Greekfo hɔn nkyerɛkyerɛ mu.”

 Nyankopɔn mmpɛ dɛ yɛdze ne nkyerɛkyerɛ bɔforafora nyimpa nyansapɛ mu. Bi nye gyedzi a binom wɔ dɛ ɔkra bi tse nyimpa mu a onnwu da. Ntsi Bible no bɔ kɔkɔ dɛ: “Hom nhwɛ yie mma obi aammfa nyansapɛ nye ndaadaa hun a ɔnam nyimpa tsetsesɛm do . . . ammbɛfa hom afo.”​—Colossaefo 2:8.