Nanga. Abahamirizi ba Yehova babà Bakristu, cikoki barhaba baporo. Bulya gurhi?

 Abaporo kuli kuderha “cigusho c’idîni cihagalika idîni Katoliki.” Ciru akaba Abahamirizi ba Yehova barhalunga okuboko enyigirizo z’idîni Katoliki. Halagi ebirhumire rhwaderha oku rhurhaba baporo:

1.   Nyigirizo nyinji z’Abaporo zirhaba za Bibliya Kwa lwiganyo, Ebibliya eyigirizize oku haba “Nnâmahanga muguma yene,” erhayigiriza obusharhu. (1 Timoteyo 2:5; Yowane 14:28) Na kandi eyerekine n’obwalagale oku Nnâmahanga arhakweba abantu omu ngulumira y’omuliro gw’ensiku n’amango, cikoki, anabashereze ensiku n’amango.​—Ennanga 37:9; 2 Abatesalonika 1:9.

2.   Rhurhahagalika idîni katoliki rhurhanalonza empindulo omu cikundi cilebe c’idîni kuhiramo idîni katoliki. Lubero n’oko, omukolo gwirhu kuba kuyalîza Obwami bwa Nnâmahanga erhi rhunagendekire rhwarhabala abantu babe n’obuyemere muli eyo myanzi minja y’obo Bwami. (Mateyo 24:14; 28:19, 20) Omuhigo gwirhu gurhaba gwakulerha empindûlo omu bikundi by’amadîni biri okw’igulu, cikoki, omuhigo gwirhu guba gwakuyigiriza abantu birhohye okuli lugenda Nnâmahanga n’Oluderho lwage Bibliya.​—Abakolosi 1:9, 10; 2 Timoteyo 2:24, 25.