Ayniwan 145 kilometro (90 millas) ta norte yuʼun Nueva York te nopol ay ta lum yuʼun Wallkill, ay chaʼoxsejp kʼinal tey-a te naʼbil sba jich bitʼil kʼinal yuʼun awal tsʼunubil yuʼun Watchtower. Te chaʼoxsejp kʼinal-abi bayal bin-utʼil tuuntesbil ta swenta te pʼijubtesel yuʼun skʼop Dios te ya spasik te stestigotak te Jehovae. Te bin ajtalil la yichʼ manel te sbabial kʼinale jaʼ ta 2 yuʼun enero ta 1963 te ayix tal cincuenta jaʼbile.

Te David Walker, jaʼ te machʼa la yil te kʼalal jajch ta manel te kʼinale, jich la yal: «Jich bitʼil te kaj ta moel yajtalul te machʼatik ya x-aʼtejik te banti ya yichʼ ilel yaʼtel te stestigotak te Jehová te ay ta Brooklyn, jaʼ yuʼun la yichʼ leel te bin-utʼil maba ya yichʼ lajinel bayal takʼin ta swenta te weʼel uchʼelile. Te organización kuʼunkotike ay smanojix kʼinal ta Nueva York-a, jaʼnax yuʼun te ayniwan wakeb hora o waxakeb hora yiloj sba sok te Brooklyn. Yan stukel te kʼinal te ay ta Wallkill aynaxniwan cheb hora sbelal. Jaʼ-abi jaʼ kʼax lekxan-a». Tey kaj ta lokʼel sit awal tsʼunubil-a, bok-ijtaj, stiʼbalul wakax, chitam, mut, leche soknix te bintik ya yichʼ pasel-ae te jaʼ la yichʼ tuuntesel te banti ya yichʼ ilel yaʼtel te stestigotak te Jehová. Ta patil la yichʼxan manel yantik kʼinal te nopol ay ta Wallkill.

Te kʼalal yak ta kʼaxel lajuneb jaʼbil-ae, te aʼtelil yuʼun te stestigotak te Jehová ta swolol Balumilal kaj ta mukʼubel jaʼ yuʼun kaj ta jelonel te aʼtelil ta Wallkill. Ma jaʼuknax ya yichʼ lokʼesel weʼelil tey-a, jaʼnix jich tey kaj ta pasel weʼelil kʼoem ta swenta te skʼop Dios jich bitʼil te junetik swenta ya yichʼxan tsobel ants winiketik te la yalbey skʼoplal te Jesuse (Mateo 9:37; Lucas 10:2; Juan 4:35, 36). Liʼ ta alan yame yichʼ albeyelxan skʼoplal te bin-utʼil tuuntesbil te kʼinal-abi.

Te banti ya yichʼ pasel imprimir. Ta jaʼbil bael yuʼun 1950 kʼalal ta 1960, jteb ma spisiluk te junetik yuʼun te stestigotak te Jehová ya spasik imprimir ta Brooklyn. Jaʼukmeto te kʼalal la yichʼ ilel te ya skʼanxan pasel bayal junetike, te imprenta maba juʼix yuʼun-a. Jich yuʼun ta yaʼbilal 1973, te stestigotak te Jehová la sjamik yachʼil imprenta ta Wallkill. Jaʼto tal-abi, ay bayal buelta yichʼoj mukʼubtesel te naetik yuʼun imprenta. Te bin-ora yichʼbeltonax mukʼubtesele jaʼ ta 2014.

Te banti ya yichʼ pasel programaetik yuʼun computadora. Ta yaʼbilal 1979 ay jtsob stestigotak te Jehová kaj spasik jun programa yuʼun computadora ta Wallkill te naʼbil sba jich bitʼil Sistema Electrónico de Edición Plurilingüe (MEPS, te siglas ay ta inglés). Ta ora ini, te programa MEPS ya xjuʼ ya spas bayal junetik te lokʼemik ta Biblia te kʼaxem ta seiscientos ta chajp kʼopil.

Te banti ya yichʼ akʼel pʼijubtesel. Ta yaʼbilal 1988 te Pʼijubtesel yuʼun sKʼop Dios ta Galaad yuʼun te Watchtower te ay ta Brooklyn, la yichʼ akʼel ta Wallkill, ta yajtalul 17 yuʼun octubre jaʼnix te jaʼbil-abi, jajch te pʼijubtesel tey-ae. Te bin-ora la yichʼxan jelel te escuela-abi, jaʼto ta abril yuʼun 1995, jaʼix-a te banti ay te Centro yuʼun Pʼijubtesel yuʼun Watchtower te ay ta Patterson (Nueva York).

Jich bitʼil te kʼoem ta pasel ta yantik kʼinal yuʼun stestigotak te Jehová, jaʼnix jich te slajibal tal cincuenta jaʼbile yichʼoj jelel te bintik-utʼil ya yichʼ pasel te aʼtelil soknix te bintik ya yichʼ pasel tey ta Wallkill. Jaʼukmeto maba komen te tulan aʼtelil ya yichʼ pasel ta swenta te bintik ya xtuun ta weʼel uchʼelil yuʼun te machʼatik yakik ta aʼtel ta naetik yuʼun te stestigotak te Jehová ta Nueva York.

Ta ora ini, te stestigotak te Jehová yakik ta spasel mukʼul naetik te ya xtuun jich bitʼil kuartoetik, oficinaetik sok yantikxan naetik ta Wallkill. Jaʼnix jich yakik ta slekubteselxan te antiguo naetik tey-ae. Spisil te bintik yak ta pasel ta Wallkill jaʼ ta swenta te maba ya xkom ta pasel te weʼelil ta swenta skʼop Dios te ya xtuun yuʼun te ipal ants winiketik te junax yakʼoj sbaik ta swolol Balumilale.

Te David Walker te la yichʼ alel ta nailale, jich la yal: «Ya yakʼbon bayal sbujtsʼ koʼtan te kʼalal ya kil spisil te bitʼil mukʼuben te aʼtelil ta slajibal tal cincuenta jaʼbile, sok spisil te bintik yichʼoj pasel ta swenta te aʼtelil yuʼun nojptesel ta Bibliae.