Эйе, Агару Бичикте Кудай бар деп керелер бар. Агару Бичик бисти сагыжысты иштедип, кудай јаҥга сананбай јадып бӱтпезин деп кӱӱнзедет (Римдегилерге 12:1; 1 Иоанн 5:20). Агару Бичиктеги керелерди кӧрӱп ийектер:

•   Вселенныйда ончо неме бойыныҥ јеринде турганы ла ондо јӱрӱм бар болгоны Јайаачы бар деп керелеп јат. Агару Бичикте айдылат: «Кажы ла тураны кем де тудуп јат эмей, је ончозын тудаачы — Кудай» (Еврейлерге 3:4). Бу шӱӱлте тегин, оны оҥдоорго јеҥил де болзо, ӱредӱлӱ кӧп саба улуска бу јаан кере болуп јат a.

•   Кажы ла кижиге эт-канныҥ керексиништеринеҥ ӧскӧ, јӱрӱмниҥ учуры неде деп оҥдоорго турган кӱӱн салынып калган. Бу дезе Кудайды билип алар ла ого бажырар кӱӱн болуп јат. Агару Бичик мыны кӧгӱс керексиништер деп айдат (Матфей 5:3; Ачылта 4:11). Бисте кӧгӱс керексиништер бар болгоны Кудай јӱк ле бар деп кӧргӱзип турган эмес, је ол улусты сӱӱп турган Јайаачы ла бисти оныла јуук колбуларлу болзын деп кӱӱнзеп турганын кӧргӱзет (Матфей 4:4).

•   Агару Бичиктеги судурлар бӱдеринеҥ канча чактар озо бичилип, чике бойыныҥ ӧйинде бӱткен. Бу судурлардыҥ оок-тегине де јетире бӱдӱп калганы, олорды кижи айтпаган деп бӱдӱмјилеп јат (2 Петр 1:21).

•   Агару Бичикти бичиген улустыҥ наукала колбулу билгирлерин ол ӧйдӧ јаткан улус аайлабай туратан. Темдектезе, јебрен ӧйдӧ кӧп саба улус јер слонныҥ, какайдыҥ, буканыҥ эмезе кандый бир тындуныҥ ӱстинде турган деп бӱткен. Је Агару Бичикте Кудай «јерди неге де илбеген» деп бичилип калган (Иов 26:7). Анайда ок Агару Бичикте Јердиҥ бӱдӱми «тегерик» деп айдылган (Исаия 40:22). Оныҥ учун кӧп саба улус мындый чын јетирӱлерди Агару Бичикти бичиген улуска Кудай берген деп сананат.

•   Агару Бичик кӧп сурактарга каруу берет, је кижи кӱч сурактарына карууларды табып болбой барала, Кудай јок деп бӱдердеҥ айабас. Темдектезе, Кудай сӱӱштӱ ле Кӱчтӱдеҥ Кӱчтӱ болордо, нениҥ учун јердиҥ ӱстинде кыйын-шыра ла јаман керектер болот? Нениҥ учун кӧп сабада кудай јаҥдар улусты јакшыны эмес, је јаманды эдерге кӱӱнзедет? (Титке 1:16).