Eyo, Biblia unyutho kamaleng’ nia Mungu nuti. Eyero bende nia ‘watii ku copo mwa mi paru i lembe’ man rieko mwa pi niketho yiyoyic ma watie ko i Mungu udok ma tek, kakare nilubo ponji mi dini lumaluma. (Jurumi 12:1; 1 Yohana 5:20) Ku lapor, kenyam i paru m’ulubo e m’ujengere iwi Biblia:

•   Ayi ma piny ma tung’ tung’ upangere ko iwi ng’om man i kor polo, ubenyutho kamaleng’ nia ng’atu moko re m’ucwiyogi. Biblia uyero kumae: “I andha, kubang’ ot ceke ng’atu moko giero en, ento ng’atu m’ugiero piny ceke utie Mungu.” (Juebrania 3:4) Paru maeno winjere yot yot, man kadok ju m’usomo de ginwang’u nia etie lemandha ma piemere ngo. a

•   Wa dhanu, watie ku yeny mi ng’eyo nia pirang’o jucwiyowa, man kadok i ng’ei ma yeny mwa mi kum upong’o de, asu wabedo ku yeny mi ng’eyo lembuno. Yeny maeno utie i kind gin ma Biblia ulwong’o nia ‘yeny mi tipo,’ m’uketho i iye bende ava ma wabedo ko mi ng’eyo Mungu man mi timo ire. (Matayo 5:3; Lembanyutha 4:11) Yeny mi tipo eno ubenyutho ngo kende kende nia Mungu utie, ento ebenyutho bende nia e Jacwic m’umaruwa lee man ebemito wapong’ yenyne.​—Matayo 4:4.

•   I Biblia, junwang’u lembila dupa ma jular jukiewo oro ma dupa i wang’e, ento lembilaman upong’o kubang’e kubang’e. Ayi ma lembeman mi lembilane upong’o ko tap tap ubenyutho nia giai i bang’ Ng’atu moko ma tego pare kadhu mi dhanu.​—2 Pethro 1:21.

•   Dhanu m’ukiewo Biblia gigam ging’eyo lembe dupa mi sians ma dhanu mi rundi migi nwang’u ung’eyo ngo. Ku lapor, i rundi ma con, dhanu ma dupa ubed uparu nia lei, saa moko nyo liec, kul mi lum kunoke jobi, re m’uyeyo ng’om. Ento Biblia uyero nia Mungu “ng’abu ng’om wi gin moko ngo.” (Yob 26:7) Kumeno bende, Biblia ukoro kamaleng’ ayi pa ng’om, eweco iwi “twodiri” pa ng’om, eno nyutho nia etie ngulungulu. (Isaya 40:22) Pieno, dhanu dupa nwang’u nia ayi ma Biblia ukoro ko lembe maeno ceke tap tap, ubenyutho nia dhanu m’ukiewe gikiewo lembe m’uai i bang’ Mungu.

•   Biblia udwoko wang’ penji dupa ma tek, ma ka judwoko wang’gi cuu ngo copo ketho ng’atini jay i kum Mungu. Edwoko wang’ penji ma calu ve: Tek andha Mungu umaruwa man e Jacopo ceke, pirang’o ke masendi man lembe ma reco usagu akeca iwi ng’om? Pirang’o wang’ mapol dini ubecwalujo i timo ma reco kakare m’eketh dhanu utim bero?​—Tito 1:16.