Furanguti tarufuduni Bíbülia anihein lan Bungiu. Ani arufuda tumuti giñe woun, lun lan wederebudagüdüni wafiñen luagu, mosu lan warufudun “gunfurandaü” lubaragiñe wafalaruni saminaü kamani buriti le lídanbei burí relihión (1 Huan 5:20; Rómana 12:1). Ariha wamá fiu resun le tíchugubei Bíbülia le arufudubalin luagu anihein lan Bungiu.

•   Lubuidun aransehani le lídanbei sielu luma ubóu lúmati ibagari le lídanbei arufudati adügǘwarügü lan. Ariñagatu Bíbülia: “Sun muna adügarügü lumutu somu gürigia; gama lumoun Bungiu adügübalin sun katei le aniheinbei” (Ebüréu 3:4). Inarüni ménrengun lan resun le, lau sun lira buídurügüti houn saragu gürigia ha subuditiña lun gunfuranda hamani. a

•   Sun gürigia ubouagu busentiña hadariruni lisuuni ibagari, anhein magunfulirun wamá ayumahani le, aba wasandirun megei wamá somu katei lidan wabagari. Ayumahani le, mámarügüñein luagu wibihini le wemegeirubei lun wabagaridun, luáguti giñe megei wamani le unbei tagúara Bíbülia “lídehan Bungiu”, mini lan le ayumaha wamá wasubudiruni Bungiu luma wáhuduragun lun (Matéu 5:3; Arufudúni 4:11). Arufudati wemegeiruni lídehan Bungiu lidan wabagari, luagu anihein lan aban Bungiu hínsiñehabuti, le adügübaliwa lau ayumahani le ani gúndaatiwa dan le wagunfulirun lau le lariñagubei woun (Matéu 4:4).

•   Gúnfuliti saragu profesía tídangiñeti Bíbülia sunsuinagubei saragu sígulu lárigiñe labürüdǘn. Arufudati lagunfulirun profesía burí le luagu mama lan hámagiñe gürigia liabin (2 Féduru 1:21).

•   Anihein meha katei lánina siensia hasubudirun ha abürühabarun Bíbülia le awanseti lun hadaani. Kei hénpulu, afiñetiña meha binadu gürigia anihein lan Ubóu ligibuagu aban lefan, aban gegéu, aban bulu bágasu o ligibuagu amu animaalu. Ánhounti Bíbülia, ariñagatu luagu Bungiu: “Dibigüdalei múa ligibuagu ni kata” (Hobu 26:7). Ani lidan iñeñein le ídanbei labürüdǘwa Isaíasi 40:22 furumiñe, ariñagati rounu lan o garara lan Ubóu. Chouru hamuti saragu gürigia ladüga lan Bungiu lan ariñagubalin houn ha abürühabarun Bíbülia hasubudirunbalin sun burí katei le.

•   Óunabatu Bíbülia saragu álügüdahani le hadügübei ha mafiñenbaña luagu Bungiu, kéiburi: Anhein buidu lubéi Bungiu ani suntigabafu ligía, ka uagu anihein lubéi saragu wuribani luma asufuriruni? Ka uagu agubuhaali lubéi relihión saragu turobuli? (Titu 1:16). Óunabagülei le tíchugubei Lererun Bungiu lun álügüdahani le luma burí lun amu gayaraabei líderagunün afiñera luagu Bungiu.