Jaʼ. Le Biblia kan nukʼüt achkë rma nuʼij chë Dios kantzij kʼo. Rchë röj nqkowin nqakʼuqbʼaʼ qakʼuʼx chrij Dios kʼo chë nqaquʼ rij jontir ri rubʼanon qa y ma xa xuʼ ta nqanmaj ri nkiʼij ri winäq (Romanos 12:1; 1 Juan 5:​20). Tqatzʼetaʼ jojun rubʼanik achkë rma le Biblia nuʼij chë Dios kantzij kʼo:

•   Nqʼalajin che kʼo jun xbʼanö jontir, rma nqatzʼët chë ronojel ri kʼo chkaj chqä chwäch le Ruwachʼulew kan pa rubʼeyal rubʼanon jontir chqä kʼo kʼaslemal. Le Biblia nuʼij: «Kantzij na wä chë xa bʼa achkë jay kʼo jun xbʼanö rchë, ye kʼa ri xbʼanö jontir ya riʼ Dios» (Hebreos 3:4). Re naʼoj reʼ ma kan ta kʼayewal nqʼax chkiwäch jontir winäq, yajün ri winäq ri kan kʼo kitamabʼal. a

•   Jontir röj winäq kan nqarayij nqatamaj achkë rma xyaʼöx qakʼaslemal aweʼ chwäch le Ruwachʼulew. Ye kʼa we ma nqatamaj ta riʼ, xa nuyaʼ jun nimaläj bʼis pa qan. Ri nqajoʼ nqatamaj más chrij reʼ kʼo más rejqalen chwäch ri nqwaʼ, ri nqatäj qa yaʼ o chwäch xa bʼa achkë na chik jun. Rma chë rukʼwan riʼ rkʼë ri nuʼij le Biblia «che nkʼatzin Dios pa qakʼaslemal». Achiʼel ri nqatamaj ruwäch chqä nqayaʼ qʼanäj ruqʼij (Mateo 5:3; Apocalipsis 4:​11). Ri nqanaʼ riʼ nukʼüt chqawäch chë kʼo jun Dios ri janina nqrajoʼ. Jun Dios ri xqr-än rchë nqatamaj ruwäch chqä rchë nqanaʼ kiʼkʼuxlal pa qakʼaslemal (Mateo 4:4).

•   Tapeʼ ye qʼaxnäq chik pa ciento chë junaʼ, ronojel ri ye tzʼibʼatäl qa chpan le Biblia kan xebʼetzʼaqät jontir. Y kan achiʼel bʼin qa kan ke riʼ xbʼanatäj, reʼ nukʼüt chqawäch chë ma runaʼoj ta jun winäq kʼo qa chpan le Biblia (2 Pedro 1:​21).

•   Jojun ri xetzʼibʼan rchë le Biblia kan xkiyaʼ qa naʼoj ri ma kitaman ta wä ri etamanelaʼ ri ye kʼo pa kiqʼij. Jun tzʼetbʼäl: Ojer taq winäq nkiquʼ wä chë le Ruwachʼulew kʼo pa ruwiʼ jun elefante, jun aq, jun wakx o xa bʼa achkë na chik jun chköp. Ye kʼa le Biblia nuʼij chë Dios pa kaqʼiqʼ ruyaʼon wä qa le Ruwachʼulew (Job 26:7). Chqä le Biblia taq nutzjoj rij le Ruwachʼulew yeruksaj tzij achiʼel reʼ: «setesïk», «sursïk» o «kʼolokʼik» (Isaías 40:22). Ye kʼïy winäq nqʼax wä chkiwäch chë ma ta yë Dios xbʼin pa rchë ri xtzʼibʼäx qa chpan le Biblia, ri achiʼaʼ riʼ ma ta xekowin xkiyaʼ qa jontir ri naʼoj riʼ.

•   Le Biblia kan nuqʼalajsaj kʼïy kʼutunïk ri nkiʼän qa chkiwäch ri winäq ri ma nkinmaj ta chë kʼo Dios, kʼutunïk achiʼel reʼ: We Dios ütz runaʼoj chqä kʼo ronojel uchqʼaʼ pa ruqʼaʼ, ¿achkë rma kʼo kʼïy tijöj poqonal chqä itzelal? ¿Achkë rumä le religión xa más kʼayewal ruyaʼon pa kiwiʼ ri winäq? (Tito 1:​16). Le Biblia nuqʼalajsaj jontir ri kʼutunïk ri nqaʼän qa chqawäch, jontir ri ruqʼalajsaxik ri kʼutunïk riʼ xkaturtoʼ rchë rït xtanmaj chë kantzij kʼo Dios.