Jiñi Biblia an chuqui tac miʼ yʌl muʼ bʌ i yʌqʼueñonla lac ñaʼtan chaʼan añʌch Dios. Cheʼ jaʼel, miʼ subeñonla chaʼan mi la com lac ñop Dios yom mi laj cʼʌn «lac ñaʼtʌbal» i mach jiñic jach mi lac jacʼ jiñi cʌntesa tac wen cʌmbil bʌ chaʼan jiñi ñopbalʌl tac (1 Juan 5:20; Romanos 12:1). Laʼ laj qʼuel chuqui tac miʼ yʌl jiñi Biblia muʼ bʌ i pʌs chaʼan añʌch Dios.

•   Jiñi universo miʼ pʌsbeñonla chaʼan añʌch majqui tsiʼ mele come wen utsʼatax bajcheʼ an yicʼot an cuxtʌlel. Jiñi Biblia miʼ yʌl: «Pejtelel ototʌl añʌch majqui tsiʼ mele, pero jiñi tsaʼ bʌ i mele pejtelel chuqui tac an jiñʌch Dios» (Hebreos 3:4). Anquese an lac piʼʌlob maʼañic bʌ i cʼʌjñibal miʼ qʼuelob ili tʼan tac, jiñi am bʌ i chaʼleyob qʼuel jun añʌch i sujmlel miʼ qʼuelob. a

•   Ti lac pejtelel la com lac tajben i sujmlel jiñi laj cuxtʌlel, mi maʼañic mi lac taj anto chuqui yom lac chaʼan mi la cubin lac bʌ. Mach cojach i cʼʌjñibal lac chaʼan jiñi i bʌl lac ñʌcʼ o lac pislel, jiñi Biblia miʼ yʌl chaʼan i cʼʌjñibal lac chaʼan jaʼel jiñi Dios, ili yom i yʌl, chaʼan la com laj cʌn Dios yicʼot la com lac chʼujutesan (Mateo 5:3; Apocalipsis 4:11). Ili miʼ pʌsbeñonla chaʼan an juntiquil Dios yujil bʌ cʼuxbiya, tsaʼ bʌ i meleyonla chaʼan mi lac mulan laj cʌn yicʼot yom bʌ chaʼan tijicñayonla (Mateo 4:4).

•   Cabʌl profecía am bʌ ti Biblia cheʼʌch ti tsʼʌctiyi cheʼ bajcheʼ tsaʼ ajli anquese cabʌlix jab ñumen. Come tsaʼʌch tsʼʌctiyi miʼ pʌs chaʼan jiñi profecía tac chʼoyolʌch ti Dios (2 Pedro 1:21).

•   Jiñi tsaʼ bʌ i tsʼijbuyob jiñi Biblia añix chuqui tac yujilob i chaʼan bʌ ciencia ti jimbʌ ora. Jumpʼejl ejemplo, ti wajali jiñi wiñicob xʼixicob tsiʼ ñopoyob chaʼan juncojt tsimin, juncojt mateʼchitam, juncojt tat wacax o yambʌ añimal cuchul i chaʼan ili Lum. Pero jiñi Biblia miʼ yʌl chaʼan maʼañic baqui chucul (Job 26:7). Cheʼ jaʼel, Isaías 40:22, ti jiñi ñaxam bʌ tsʼijbujel, miʼ yʌl chaʼan ili Lum «pitil». Cabʌl lac piʼʌlob, miʼ chʼʌmbeñob i sujm chaʼan jiñi tsaʼ bʌ i tsʼijbuyob jiñi Biblia tsiʼ yʌlʌyob jiñi come Diosʌch tiʼ subeyob.

•   Jiñi Biblia miʼ yʌqʼuen i jacʼbal cʼajtiya tac muʼ bʌ i melbeñob i bʌ jiñi mach bʌ añic miʼ ñopob Dios, bajcheʼ: Mi Dios uts i pusicʼal yicʼot wen pʼʌtʌl, ¿chucoch cʌlʌxix jontolil yicʼot wocol? ¿Chucoch an i teche cabʌl wocol jiñi ñopbalʌl tac? (Tito 1:16). Jiñi i jacʼbal muʼ bʌ i yʌcʼ jiñi Biblia chaʼan ili cʼajtiya tac yicʼot yan tac bʌ miʼ mejlel i coltañet chaʼan maʼ ñop Dios.