Nechi, Ebiblia eherhe byemezo binene biyerekene ku Mungu abaho. Byakarhurhabala rhugwarhe obwemere mu Mungu arhali mpukufa yemera eby’edini lyanaderhere nka mpumi konyine, s’ahubwe omu kukolesa “obuhashe bwerhu b’okuwaza n’okuchirhegereza.” (Waroma 12:1; 1 Yohana 5:​20, Mahugulo m’eshishi) Ba nka wawaza k’obula bulyo b’okukengera buyimangire oku Biblia:

• Amahanga moshi, okuntu maba mapangirwe, mali mu n’ebilemwa bizene mayerekene oku haba Omulemi. Ebiblia ederhere: “Kweri, buli nju ejira owayiyumbakaga. Aliko owayumbakaga ebintu byoshi ali Mungu.” (Waebrania 3:4) Chiro akaba oku bubonekene nka bukweri buyanguhire, basomi banene banabona oku ebyola bili binwa biherhe emisi. *

• Rhwewe nka bantu, rhunaburhwana enyorha y’okulonza kuyunva akalamo chili chichi n’omuhigo gwako guli guhe. Buli nka buko bw’enzara omuntu anayorhana chiro akaba alire. Echola ch’Ebiblia eyirika “bukene bw’ekiroho,” buhirire mw’enyorha y’okumenya Mungu n’okumukolera. (Matayo 5:3; Ufunuo 4:11) Eyola nyorha y’ekiroho erhayerekene konyine oku Mungu abaho s’ahubwe oku ali Mulemi w’obuzigire olonzeze rhubone gurhe rhwakatosheka kw’eyola nyorha yerhu.—Matayo 4:4.

• Amalebi maba omu Biblia maba eyi mayandikwaga amagana m’emyaka embere mayenere, aliko manayinja kuyenera buzira kubulwa ku na higuma. Okubona gurhe bunayenera ntyo buzira kubulwa ku chiro na hityu, chili chemezo chikomere chiyerekene oku bwarhengereraga ok’oli eyanya bwenene y’obuhashe bw’abantu.—2 Petro 1:21.

• Abayandikaga Ebiblia balipatire obumenyi bw’esianse burhalukire obw’abantu b’echihe chabo. Omufano, Mira abantu banene bagendaga bawaza mpu egulu liba lisigikirwe n’enyama nguma ntya nk’etembo, Echigulube chizibu-zibu ch’elubala, changwa echimasha. Ebiblia yowe yaderha oku Mungu “aba alihanikire aharhali chintu.” (Yobu 26:7) Intyo k’onokola, Ebiblia yafasiria bwinja gurhe egulu liba libumbirwe nka “muviringo” changwa “chibumbuli” (Isaya 40:22 Mahugulo m’eshishi; Douay Version) Bantu banene banabona oku koshi bakafasiria gurhe abola bayandikaga Ebiblia bakaba bamenyaga ebyola mw’ezola siku za mira, echiyunvikene kuli okuba Mungu wabahaga emyazi bayandikaga.

• Ebiblia ejira ebishubizo bya bibazo binene bikomere, byakarhuma nk’omuntu arhapatire ebishubizo byabo akazinda analahira ku Mungu arhabaho. Omufano, Akaba mungu ajira obuzigire, anali munya misi yoshi, gurhe si egulu lijire lyaba mw’amateso n’ebintu bibi? Chirhumire edini lyarhuma abantu bajira ebibi ahali h’okujira ebinja?—Tito 1:16.