Phau Vajlugkub muaj pov thawj qhia tias yeej muaj Vajtswv tiag. Phau Vajlugkub txhawb kom peb muaj kev ntseeg rau Vajtswv, tsis yog peb cia li lam tau lam ntseeg tej uas cov kev ntseeg qhia, tiam sis peb yuav tsum ua tib zoo xav thiab txawj txiav txim siab zoo. (Loos 12:1; 1 Yauhas 5:20, qab taw qhia) Cia peb mus kawm ntxiv seb phau Vajlugkub qhia li cas:

•   Ib lub qab ntuj uas muaj tau txoj sia thiab muaj chaw txawb chaw rau qhia tias yeej muaj ib tug Tswv Tsim. Phau Vajlugkub qhia tias: “Tej tsev yeej muaj tus ua, tiamsis Vajtswv yog tus tsim ib puas tsav yam.” (Henplais 3:4) Txawm tias cov lus no yooj yim xwb los coob tus neeg txawj ntse pom tias txoj kev xav no yeej tseem ceeb heev. a

•   Tib neeg yeej xav paub tias peb lub neej puas muaj qab hau dab tsi. Txawm peb muaj txhua yam lawm los peb yeej tsis txaus siab yog tias peb tsis paub lub ntsiab rau noob neej. Phau Vajlugkub qhia tias yam uas noob neej cheem tsum yog qhov uas los nrog Vajtswv sib raug zoo thiab los teev tiam nws. (Mathais 5:3; Tshwmsim 4:11) Qhov uas peb xav muaj ib txoj kev sib raug zoo nrog Vajtswv qhia tias yeej muaj Vajtswv tiag thiab qhia tias nws yeej hlub peb thiab xav kom peb nrog nws sib raug zoo.​—Mathais 4:4.

•   Tej lus faj lem hauv phau Vajlugkub twb tau muab sau ntev los lawm thiab yeej muaj tiav raws nkaus li tau sau tseg. Qhov uas muaj tiav raws nkaus li tau sau tseg, qhia tias yeej yog los ntawm ib tug uas muaj hwj chim tshaj tib neeg.​—2 Petus 1:21.

•   Cov uas sau phau Vajlugkub paub txog kev tshawb txuj ci mus tau deb tshaj li cov neeg uas nrog lawv nyob ib tiam. Piv txwv li, thaum ub neeg xav tias lub ntiaj teb txawb saum ib tug tsiaj, xws li ib tug ntxhw, ib tug npua teb, los sis ib tug nyuj. Tiam sis phau Vajlugkub twb qhia tseg lawm tias lub ntiaj teb “dai rau lub chaw uas nyob khoob ntshuv.” (Yauj 26:7) Tsis tas li ntawd phau Vajlugkub qhia meej tias lub ntiaj teb kheej kheej zoo li lub voj voog. (Yaxayas 40:22) Muaj coob tus xav tias tos cov uas sau phau Vajlugkub sau tau raug ua luaj los twb yog Vajtswv yog tus uas qhia rau lawv.

•   Phau Vajlugkub teb tau tej lus nug tob tob uas tib neeg teb tsis tau. Thaum tib neeg nrhiav tsis tau ib yam dab tsi los pab lawv lub neej ces lawv yuav xav tias tsis muaj Vajtswv tiag. Lawv xav tias: Yog Vajtswv muaj kev hlub thiab muaj hwj chim loj dua ntais, ua cas ho muaj kev txom nyem thiab kev phem nyob thoob ntiaj teb? Vim li cas kev ntseeg feem ntau yog siv los ua phem tshaj li ua zoo?​—Titus 1:16.