Egga Kari Dios?
I tabbag na Biblia
Wan, pakurugan na Biblia nga egga Dios. Makoffun yatun nittam nga mapeggan tu pangurug ta Dios, ari tu megafu ta yatun i kakkagian na relihion ira, nu ari, kagian na Biblia nga “innan nu ta mapia nu kurug ngamin danaw nga kagiad-da” anna usannu i ‘pakalippawanu.’ (1 Tesalonica 5:21; 1 Juan 5:20) Innattam i karuan ira nga kagian na Biblia:
Pakurugan na maayus nga uniberso nga egga i Namaratu. Kagian na Biblia: “Kurug tu tolay i namataddag ta kada balay, ngem i Dios i nangngua ta ngamin nga ganna-gannug.” (Hebreo 3:4) Simple laman yatun ngem kurugan na edukadu ira nga totolay nga rasonable yatun nga pamakurug. a
Egga i negagangay nga pakkaraga tam nga alippawatan i kebalinan anna i gakkag na pattolay. Matageno tam lagapa yatun maski nu meyawa i pisikal nga pakawagattam. Yatun i kagian na Biblia nga espiritual nga pakawagattam, kasali tatun i pakkaraga nga ammuan anna dayawan i Dios. (Mateo 5:3; Nepakannammu 4:11) I espiritual nga pakawagattam i mamakurug nga egga Dios, minaggiddu yayya nga Namaratu anna ikayana nga iyawa yatun nga pakawagattam.—Mateo 4:4.
Eksakto nga natuppal i detalyadu nga profesiya ira ta Biblia maski piga siglo ngana i nappasa turi ta netura danatun. Pakurugan na fustu anna detalyadu ira nga informasion meyannung taw ira nga profesiya nga naggafu danatun ta Dios.—2 Pedro 1:21.
Egga ira i ammu na nattura ira ta Biblia meyannung ta siensia nga ari ammu na totolay ta tiempoda. Angngariganna, kurugan na totolay dati nga egga i nakepotungan na davvun tu ayam, kagitta na elefante, bavi, onu baka. Ngem ari nga kunnatun i kagian na Biblia. Kagianna nga i Dios, “awan tu nangibesinganna ta davvun.” (Job 26:7) Kagian gapa na Biblia nga “sirkulo,” onu “globo” i davvun. (Isaias 40:22; Douay Version) Kagian na aru nga totolay nga ammu yatun na nattura ira ta Biblia megafu ta naggafu ta Dios yatun nga informasion.
Tabbagan na Biblia i mariga ira nga pakkiavu tam nga nu ari matabbag danatun, mabbalin tu ateista i tadday nga tolay. Angngariganna: Nu i Dios ay aya anna Makapangngua sa Ngamin, ngatta ipamavulunna i pazziga-riga anna kinamarake? Ngatta influwensian ittam na relihion nga magangngua tu marake imbes nga mangituddu nakuan nittam tu mapia?—Tito 1:16.
a Angngariganna, kinagi bi na astronomer nga si Allan Sandage meyannung ta uniberso: “Imposible nga gavva laman nga limittuag i kunnatun ka-unnug [nga uniberso]. Siguradu nga egga i nangi-unnug tatun. Para niakan misterio i Dios, ngem yayya laman i rason nu ngatta limittuag i ngamin nga gannug.”
Baka Kaya Mu Gapa i
NABALOR IRA NGA TUTTUDDU TA BIBLIA
Kurug Kari i Dios?
Gigiammuan i ebidensia ira nga rasonable i pangurug ta Dios.
MEYANNUNG NIKAMI
Mar-request tu Egga Mabbisita Nikaw
Pabbidan i tadday nga pakkiavu meyannung ta Biblia, onu mas paga nga ammuan i meyannung ta Saksi ira ni Jehova.