Li Santil Hu naxkʼutbʼesi chi tzʼaqal re ru naq wank li Yos. Joʼkan naq re xkawubʼresinkil li qapaabʼal chirix li Yos, tento naq tqoksi chiʼus li «qanaʼlebʼ» ut inkʼaʼ xkʼambʼal qe rikʼin li nekeʼxkʼut li junchʼol chi paabʼal (Romanos 12:1, Li Santil Hu, Sociedad Bíblica de Guatemala, SBG; 1 Juan 5:20). Tqil wiibʼ oxibʼ li naʼlebʼ li naxye li Santil Hu li naxkʼutbʼesi naq wank li Yos:

•   Rilbʼal naq saʼ li choxachʼochʼ tustu ru chixjunil ut wank li yuʼam naxkʼutbʼesi naq wank ani kiyobʼtesink re. Li Santil Hu naxye: «Xbʼaan naq li junjunq chi kabʼl wank aj yiibʼahom re; aʼut laj kabʼlanel re li choxachʼochʼ aʼan li Yos» (Hebreos 3:4, SBG). Chiru wiibʼ oxibʼ li kristiʼaan li naʼlebʼ aʼin maakʼaʼ xwankil, abʼan choʼq rehebʼ li tzolbʼilebʼ chiʼus li naʼlebʼ aweʼ wank xyaalal. a

•   Ak re naq naqaj xtawbʼal xyaalal li qayuʼam, abʼan naq inkʼaʼ naqataw, naqekʼa naq maakʼaʼ nokooʼok wiʼ. Chisaʼ aʼin moko naʼokenk ta kaʼajwiʼ li naʼajmank saʼ li junxaqalil, naʼokenk bʼan li naxye li Santil Hu «naq naʼajmank li Yos saʼebʼ li xyuʼam» li kristiʼaan. Joʼkan naq aʼin ajwiʼ naraj xyeebʼal xnawbʼal ut xloqʼoninkil ru li Yos (Mateo 5:3, La Biblia. Traducción del Nuevo Mundo, TNM, 2019 saʼ español; Apocalipsis 4:11). Aʼin naraj xyeebʼal naq wank jun li Yos li jwal narahok, li xooxyobʼtesi re naq tqakʼe saʼ ajl saʼ li qayuʼam ut sahaq saʼ li qachʼool (Mateo 4:4).

•   Naabʼal rehebʼ li propesiiy re li Santil Hu keʼtzʼaqlok chi tzʼaqal re ru usta junxilaj kitzʼiibʼamank chaq. Ut xbʼaan naq keʼtzʼaqlok chi tzʼaqal re ru naxkʼutbʼesi naq moko xkʼaʼuxl ta li winq (2 Pedro 1:21).

•   Li keʼtzʼiibʼank chaq re li Santil Hu wankebʼ raj xnawom chirix chanru kʼubʼanbʼil li choxachʼochʼ chiruhebʼ li kristiʼaan li wankebʼ chaq saʼebʼ li xkutan. Jun eetalil, li keʼwank chaq najter qʼe kutan keʼxkʼoxla naq li Ruuchichʼochʼ wank saʼ xbʼeen jun elefante, jun kʼicheʼ aaq, jun li toor malaj jalan chik li xul. Abʼan li Santil Hu naxye naq li Yos «kixkʼojobʼ li ruuchichʼochʼ saʼ xnaʼaj chi maakʼaʼ nakuutunk re» (Job 26:7, SBG). Joʼkan ajwiʼ, naq li Santil Hu naʼaatinak chirix li Ruuchichʼochʼ naroksi li aatin «xsursukil» (Isaías 40:22, TNM). Naabʼalebʼ li kristiʼaan nekeʼxye naq ebʼ li keʼtzʼiibʼank chaq re li Santil Hu nekeʼxnaw chixjunil aʼin xbʼaan naq li Yos kiyehok chaq rehebʼ.

•   Li Santil Hu naxsume naabʼal ebʼ li patzʼom li nekeʼxbʼaanu li inkʼaʼ nekeʼxpaabʼ naq wank jun li Yos. Jun eetalil, wi li Yos chaabʼil ut nim xwankil, kʼaʼut naq wank naabʼal li maaʼusilal ut rahilal? Kʼaʼut naq naabʼal li rahilal naxkʼam chaq li paabʼal? Li xsumenkil li naxkʼe li Santil Hu chirixebʼ li patzʼom aʼin ut jalan chik naxtenqʼahebʼ li kristiʼaan re naq teʼxpaabʼ naq wank jun li Yos (Tito 1:16).