Я, анзына Библияда ізестіг киречілестер пар. Библия религия ла Худай пар тіпчеткен ӱчӱн Худайға киртінерге кирек тіп ӱгретпинче. Че киртіністі чахсы, ибіре сағынып алып, тилідерге ӱгретче (Римдегілерге 12:1; 1 Иоанның 5:20). Библияда тӧстелчеткен киречілестерні хығырып алыңар:

•   Тилекейде прай ниме ипти-оңдайли полчатханы паза анда чуртас пары Чайаачы парын киречілепчелер. Библияда чоохталча: «Ноо даа тураны кем-де пӱдір салған. Худай, тізең, прай нимені пӱдір салған» (Еврейлерге 3:4). Пу сағыс олаңай полза даа, кӧп пӧзік ӱгредігліг кізілер аны ізестіг киречілес тіп санапчалар a.

•   Полған на кізі чуртастың смыслын піліп аларға хынча. Физическай кирексіністерін толдырчатса даа, кізі чуртастың смыслын тілирін тохтатпинча. Чуртастың смыслын табарға паза Худайны піліп алып, ағаа пазырарға кирексіністерні Библия «духовнай кирексініс» тіп адапча (Матфей 5:3, Наа Тилекей тілбестее; Азых чоох 4:11). «Духовнай кирексіністер» пары Худай парын на нимес, ідӧк аның кізілерге хынчатханын паза кирексіністерібісті толдырзыннар тіп сағынчатханын киречілепче.

•   Ухаанҷыластар Библияда пазылғаннаң сығара толғанҷа нинҷе-де век ирт парҷаң паза ол ухаанҷыластарда пазыл парған киректер тузында толҷаңнар. Кізі хап-орта паза тузында толар иде ухаанҷылап полбасчых. Худай ла іди ухаанҷылап полча (2 Петрның 1:21).

•   Библияны пасхан кізілернің андағ пілістер полған, хайзыларын ол туста чуртаан кізілер піл полбаҷаңнар. Кӧзідімге, пурунғы тустарда кізілер чир слонда, сас сосхада, пуғада алай хайдағ-да пасха малда чатча тіп киртінҷеңнер. Че Библияда Худай «чирні чох нимее іл салған» тіп пазылча (Иов 26:7). Библия ідӧк чир тоғылах полчатханын орта кӧзітче (Исаия 40:22). Кӧп кізі андағ пілістерні ол туста Худай ла пир поларҷых тіп санапча.

•   Библия кӧп сидік сурығларға нандырча. Ол сурығларға нандырығлар таппин, пірее кізілер атеисттер пол парчалар. Кӧзідімге, мындағ сурығларға нандырча: Худай хыныстығ паза прай нимедең кӱстіг полза, ноға чирде иреелер паза чабал киректер анҷа кӧп? Ноға религиознай кізілер удаа, чахсы киректер итпин, чабал киректер итчелер? (Титке 1:16).