Eyowa, Bible udi ufila bijadiki bilelela bia ne: Nzambi udiku. Udi utukankamija bua kukolesha ditabuja dietu kudi Nzambi, katuyi tuitabakanangana malu tshianana tshianana to, kadi tuenza mudimu bimpe ne ‘bieledi bietu bia meji’ ne ‘lungenyi.’ (Lomo 12:1; 1 Yone 5:20, dimanyisha) Tumonayi ngenyi miangatshila mu Bible idi itujadikila ne: Nzambi udiku.

•   Bulongame bua bintu bidiku ntshijaki tshia ne: kudi Mufuki. Bible udi wamba ne: “Bulelela, nzubu yonso mmuibaka kudi muntu kampanda, kadi uvua muibake bintu bionso nNzambi.” (Ebelu 3:4) Nansha mudi mêyi a mu Bible aa umvuika bipepele, kadi bantu ba bungi badi balonge bikole badi baangata ne bukole bua bungi. *

•   Bu mutudi bantu, tudi baledibue ne dijinga dia kumanya bua tshinyi tudi ne muoyo. Dijinga adi didi anu bu nzala idi kayiyi ijika nansha tuetu bamane kudia. Ke tshitu Bible ubikila ne: ‘dijinga dia malu a mu nyuma,’ mmumue ne: dijinga dietu dia kumanya Nzambi ne kumutendelela. (Matayi 5:3; Buakabuluibua 4:11) Dijinga dia malu a mu nyuma didi ditujakila ne: Nzambi udiku ne kabidi mMufuki wa dinanga udi musue bua tudikumbaje.​—Matayi 4:4.

•   Mêyi a buprofete adibu bumvuija bimpe mu Bible, avuabu bafunde kukadi bidimu nkama ya bungi mmakumbane anu mukavuabu balaye. Bulelela bua mêyi au ne mushindu udibu bawumvuije, bidi bileja patoke ne: adi afumina kudi muntu udi ne bukole bua bungi kupita bantu.​—2 Petelo 1:21.

•   Bafundi ba Bible bavua ne dimanya dia malu a bia panu divua dipitshile bantu ba tshikondo tshiabu mutu. Tshilejilu, bikondo bia kale bantu ba bungi bavua bitaba ne: buloba mbuambula kudi nyama bu mudi Kapumbu, Ngulube wa dîtu, anyi Ngombe mupakula. Kadi Bible yeye udi wamba ne: Nzambi ‘mmulembeleje buloba kabuyi bukudika ku tshintu.’ (Yobo 26:7) Nunku, Bible udi umvuija mushindu udi buloba bimpe menemene wamba ne: budi “dibulunge” anyi “tshijengu.” (Yeshaya 40:22, dimanyisha; Bible​—Nkudimuinu wa bulongolodi bupiabupia) Bantu ba bungi batu bamba ne: Nzambi ke uvua muambuluishe bafundi ba Bible bua kufila diumvuija dijalame didi diumvuika edi.

•   Bible udi wandamuna nkonko ya bungi itu itatshisha bantu, nkonko ayi itu ifikisha bantu ku diamba ne: Nzambi katuku bobu kabayi bapete mandamuna mimpe. Tshilejilu, pikalabi ne: Nzambi udi ne dinanga ne ngua bukole buonso, bua tshinyi mmulekele makenga ne malu mabi pa buloba? Bua tshinyi bitendelelu bitu bitamba kusaka bantu bua kuenza malu mabi pamutu pa kuenza malu mimpe?​—Tito 1:16.